ملحن ”عيش بشوقك” يكذب تصريحات حمادة هلال الأخيرة: ”تامر حسني بره القصة دي”
كذَّب الملحن المصري بلال سرور التصريحات التي كان قد أدلى بها الفنان حمادة هلال حول أغنية "عيش بشوقك" للنجم تامر حسني.
وقال بلال سرور، عبر حسابه الشخصي في "فيس بوك": " مرة فنان كلمناه أنا والشاعر مصطفى حسن، يجيلنا يجرب غنوة بصوته، الفنان ده جيه وغنى واتبسط، ثم اختفى 6 شهور مبيردش حتى على تليفون، فالأغنية راحت لصاحب نصيبها، يقوم الفنان الأولاني يبدأ يطالب بأحقيته في الغنوة دي ويدعي إنها أغنيته وإنه تعب فيها!! الكداب بيروح النار".
وأوضح بلال سرور في منشور أخر تفاصيل الحكاية، قائلا :"لفتره كبيره انا مش فاكر هيا قد إيه كنا بنحاول نكلم حماده ونبعتله رسايل ومفيش اي نوع رد منه لا بالسلب ولا بالايجاب بيروح افراحه وشغله عادي وحفلاته وبيسافر ويرجع وبرده مبيردش، بيقابل فنانين وبيسمع اغاني تانيه عندهم وبرده مبيرجعلناش يقولنا ناوي يعمل ايه، بعد ما صلينا استخاره. سمعنا اغنيه لصديقنا المنتج هاني محروس اللي كان بيحضر انه ينتج اغنيه للفنان تامر حسني فالتوقيت ده واتفقنا ان الاغنيه يغنيها تامر حسني وبرده حماده مش ظاهر فالصوره".
وتابع : "الغنوه سجلناها وبدا تامر تصويرها، هنا ظهر الفنان حماده، وبدا يكلم مصطفي حسن يللا انا جبت منتج للاغنيه تعالو ننفذها وهو هيحاسبكوا، الفكره بالنسبه للفنان حماده انه مكنش عايز يشتري الاغنيه هو كان راكنها وبيدور علي حد يشتريها، احنا طبعا اتصدمنا وفهمناه ان الاغنيه اتباعت، طبعا هو كان متضايق جدا بس ده فشغلنا شئ طول الوقت وارد لان انت ملتزمتش معانا بحاجه !!!! ولا حتي بتقدير انك تتواصل معاناحماده اتضايق جدا وبقي بيطلب مننا باي شكل نرجع الغنوه وان المنتج هيديكو اللي انتو عايزينه".
وأضاف:" احنا طبعا كنا التزمنا مع هاني محروس والفنان تامر حسني
وأنا بقسم بالله ومش محتاج احلف اني من كتر ما صعب عليا حماده فكرت انا ومصطفي نستاذن تامر ونرجعله الاغنية، فالتوقيت ده الفنان حماده هلال كلم الفنان تامر حسني، وطلب منه الاغنيه وافترا علينا وقاله انها معموله علي ايدي وشقيت فيها طبعا ده محصلش، ومش منطقي اصلا انه يحصل. بس هو قال كده عشان يأثر علي تامر، وبالفعل الفنان تامر حسني كلمني وقاللي هو اللي بيقولو حماده ده صح انا طبعا ركبني عفريت، وفهمته القصه وخلص الموضوع، واعتذرنا لحماده وكل الدنيا غلطته".
واستكمل: "ولما الغنوه نزلت ونجحت بقيت كل ما اقابل حد لمده شهووور يقوللي ليه عملتو كده مع حماده، اروح مفهمه القصه كإني متهم، وكل الناس اللي فالوسط عارفين الموضوع ده
وعارفين ان حماده مش صاحب حق، دلوقتي بعد ما عدي سنين الموضوع اتفتح، وناس عماله تبعتلي كلاك غريب وانتو ازاي تعملوا معرفش ايه !!!!! الجمهور والفانز انتو فوق راسنا كلنا واحد واحد، بس مش معني انك بحب فنان انك تصدق وخلاص وتتهم فنان تاني بحجات مش حقيقيه. الفنان الكبير تامر حسني بره القصه دي تماما، وهو مش ناقص اغاني عشان ياخد حاجه مش بتاعته الغنوه دي غنوه تامر حسني وانا فخور انها فتاريخه وفمشواري".
وفي النهاية وجه رسالة لجمادة هلال، كاتبا:" لو كنا جينا عليك يا حماده مكنش ربنا كرمنا فيها …. وانت لو صاحب حق مش هتطلع تقول كده على فنان ونجم كبير إنت عارف انه بره القصه".
وكان حمادة هلال ظهر في برنامج "حبر سري" للإعلامية أسما إبراهيم و صرح أن أغنية "عيش بشوقك" والتي قام بغنائها المطرب تامر حسني، كانت في الأصل له واستمر في العمل عليها لمدة 6 أشهر.
مسلسل المداح الجزء الثاني
وعلى الجانب الأخر، يخوض حمادة هلال، المارثون الرمضاني القادم بمسلسل "المداح 2 - أسطورة الوادي" مع النجوم: هبة مجدي، وكمال أبو رية، ولاء الشريف، وأحمد فؤاد سليم وغيرهم من الفنانين.
