عفاف مصطفى: بقالي 7 شهور محدش إداني رنة تليفون و عشان اشتغل بشوف العذاب
أعربت الفنانة عفاف مصطفى عن استيائها من قلة أعملها في الفترة الأخيرة، وذلك خلال لقائها مع الإعلامية مروة صبري في برنامج "قعدة ستات" المذاع عبر قناة ألفا اليوم.
وقالت عفاف مصطفى: "جرت العادة إني أنتظر رمضان من الموسم للموسم زي زي باقي زملائي الممثلين، ده غير الأوف سيزون".
وتابعت: "أنا كل سنة بشتغل في الأوف سيزون ما لا يقل عن عملين أو ثلاثة، بالإضافة إلى فيلم أو فيلمين، وبقالي 6 أو 7 شهور الأوف سيزون مفيش حاجة ظهرت ولا حد خبط على بابي أو إداني رنة تليفون".
وواصلت: "بدأت تحضيرات رمضان من حوالي شهر، وفي حوالي 34 مسلسل ومفيش حد بيقول إنت فين، طيب إيه اللي جد عليا؟ وأنا متعودة أعمل من مسلسسل لأربع مسلسلات في رمضان، وفي سنة 2012 عملت 12 مسلسل، الإنسان لازم يحس إنه موجود ومطلوب، لكن في غموض مش فاهماه".
وأضافت:"الشغل مبيجيش بسهولة ومش بمزاجنا، عشان اشتغل بشوف العذاب، وأنا طول الوقت في تواصل مع المخرجين والمنتجين والمنتجين الفنيين، وأكثرهم بيحبوا يتعاملوا معايا لإني مبأفورش في الأجر".
وسبق واشتكت عفاف مصطفى من قلة أعمالها في منشور عبر صفحتها في موقع التواصل الاجتماعي فيسبوك، حيث كتبت : "أتردد في الفضفضة تفاديا للتطاول من قلة مشوهه، ياجماعة بصدق أنا في أزمة في وطني الفني، الآن 40 مسلسل لرمضان ولأول مرة أصبح جليسة المنزل لأسباب مجهولة".
وفي منشور أخر، كتبت: "تليفونات جاتلي من صحفيين بيسألوني انتي عارفه السبب زي ما احنا عارفين صح.. بأرد عليهم يعلم الله وحده وده حقيقي يعلم الله وحده لا أتهم احد بأنه مانع لشغلي ولكن حاليا تبدل حالي وبقيت قاعده في الوقت اللي كنت دينامو شغل و كنت ارفض من المعروض أدوار لا تكون فعاله دراميا او إضافة لي وبرضو لا أتهم أحد".
وأردفت:" سوف تتضح الأمور بعد انتهاء الموسم الدرامي اللي بنتظره بحب وشغف من السنه للسنه بس لا أنكر إني ماشتغلتش نهائي في الأوف سيزون ولأول مره والله وده اللي زرع الشك جوايا وخلقني خلاني دماغي مش مبطلة تفكير الأربعه وعشرين ساعة.. جايز اكون متسرعة في طلب الرزق ولسه فيه أمل لكن عقلي رافض الاطمئنان نهائي.. على فكره كلنا كفنانين رهينة رنة تليفون".
آخر أعمال عفاف مصطفى
الجدير بالذكر، أن آخر أعمال عفاف مصطفى، هو مشاركتها في مسلسل "بـ 100 راجل" بطولة النجمة سمية الخشاب، والذي تم عرضه بموسم مسلسلات رمضان 2024.
