محمد سامي يستعيد ذكريات دعم تامر حسني له.. والأخير يرد: خلتني أدمع يا سمسم
استعاد المخرج محمد سامي ذكريات دعم النجم تامر حسني له في بداية مسيرته في الدراما التليفزيونية.
ونشر محمد سامي صورة تجمعه بتامر حسني قبل سنوات عبر صفحته الرسمية في موقع التواصل الاجتماعي إنستجرام، وعلق كاتبا: "وَلَا تَنْسَوُا الْفَضْلَ بَيْنَكُمْ. وأنا قاعد إمبارح في التصوير افتكرت الرحلة و الشقى و التعب من أول عمل لحد العمل اللي بصوره دلوقتي، و افتكرت صعوبة الحصول على فرصة عشان الواحد يثبت نفسة ويحقق أحلامه، فطبعا افتكرت أخويا و صاحبي الجدع الطيب الخلوق اللي دعمني من أول لحظة و كان سبب في اللي أنا فيه دلوقتي".
وتابع : "تامر قدملي كل الدعم و الحب و الامكانيات اللي خلتني اثبت نفسي وبالذات في وقت كان صعب الشباب ياخد في الدراما فرصة بحجم مسلسل آدم، فاكر اني الكل كان رافض اني اخد الفرصة دي ومستكبرينها عليا الا هو وقف في ظهري كأنه بيحارب لأخوه، و بصلي مرة والظروف كلها ضدي و كنت حاسس وانا بحضر انهم هيجيبوا حد غيري و قاللي ده مسلسلك و هتعمله و هتنجح و هتنجحنا معاك، حتى طريقته المتواضعة و هو بيقوللي مسلسلك كأني عامل تسع مسلسلات قبله تحسس الواحد بنفسه و أهميته".
واتم: "أشهد أمام الله إنك طول عمرك متواضع و مؤدب وتطلب الحاجة باحترام، ومع الكرو محترم وعشان كده كلنا روحنا فيك، بحبك يا صاحبي و تستاهل كل حاجة حلوة يا أجمل قلب، ويا رب يرزق كل الناس باللي يساعدهم على تحقيق أحلامهم زي ما رزقني بتامر حسني".
تامر حسني يرد على محمد سامي
وعلق تامر حسني على منشور محمد سامي، كاتبا: "يا سامي يا حبيبي يا ابن الناس الطيبين شكرا من كل قلبي على كل حرف خارج من قلبك كتبته في حقي، خلتني أدمع يا سمسم ، أولا أنا صدقت موهبتك من وانت صغير سنا لإنك فعلا موهوب موهبه مش عادية وتاريخ نجاحاتك يشهد بكده، كنت عارف وأنا بقدمك إني بقدم مكسب حقيقي للصناعة ومن يوم ما سجلت رقمك على تليفوني وهو مكتوب سامي ابني، عشان كان إصراري على تقديمك كان بقلب أب مش صديق من سنك أب مصدق في ابنه وعارف إن الناس مش هيدوله فرصة يطلع عشان سنه صغير".
وأضاف: "مسلسل آدم، فيلم أهواك، فيلم تصبح على خير .. ولسه إن شاء الله نجاحات جايه مستنيانا مع بعض، ربنا يوفقك يا حبيبي في كل شغلك اللي جاي وتكسر الدنيا وفي القمة زي عادتك، يا محمد شكرا تاني على البوست الصادق ده شكرا يا أصيل يا محترم، ربنا يخلينا دايما لبعض ضهر وسند".
على الجانب الأخر، يتعاون محمد سامي مع زوجته مي عمر في مسلسلها الجديد لشهر رمضان 2025، ويحمل اسم "إش إش".
بينما ينشغل تامر حسني في تصوير أحدث أفلامه "ري ستارت" مع هنا الزاهد، باسم سمرة، محمد ثروت، وغيرهم، والفيلم من تأليف أيمن بهجت قمر، وإخراج سارة وفيق.
