توفى بعد مشاجرة في مستشفى الأورام.. موعد ومكان جنازة الفنان تامر ضيائي

توفي الفنان تامر ضيائي، أمس الأربعاء، عن عمر يناهز 50 عامًا؛ بعد مشاجرة نشبت بينه وبين فرد أمن في إحدى مستشفيات الأورام، بسبب أولوية الدخول، ليقوم الأخير بالاعتداء عليه بالضرب المبرح حتى يفقد أنفاسه الأخيرة.

و تشيع جنازة الفنان الراحل عقب صلاة عصراليوم الخميس من مسجد السيدة نفيسة بالخليفة على أن يكون الدفن بمقابر العائلة بمقابر البساتين في الخليفة.

وقررت نقابة المهن التمثيلية برئاسة الدكتور أشرف زكي تشكيل لجنة لمتابعة حقوق تامر ضيائي وأسرته، وذلك بعد أن توفي أثر تلك المشاجرة .

وصية تامر ضيائي

وكان تامر ضيائي نشر وصيته على حسابه الشخصي بموقع التواصل الاجتماعي "فيس بوك" بتاريخ 12 مايو الماضي، قائلا : "ده هيفضل باين على صفحتي لحد ما أموت، الحقيقة إللى كلنا عارفينها ومتأكدين منها، إننا كلنا ربنا كتبلنا إننا نموت في ميعاد محدد غير معروف، وعشان كده كتبت الكلام ده لأني محتاج حاجات معينة تتعمل، وحاجات خايف تتعمل وأنا مش عايز حد يعملها لمجرد إنها معروفة، ووقتها طبعا مش هعرف أقولها لحد".

وتابع: صلاة الجنازة أهم من العزا وهي اللي كل ما العدد زاد كل ثوابي ما كان أكتر، فأرجوكم تصلوا عليا مش شرط تيجي العزا وياريت لو اتعمل في البيت أو مكان بسيط بفلوسه تطلعوا صدقة جارية أفضل و من فضلكم لم يثبت أو يتفق عليه عمل ختمة قرآن للمتوفي إنها هتوصله، بس مثبت إن الدعاء والصدقة بيوصلوا للميت، فرجاء دي بالذات بلاش وادعولي الوقت اللي هتقروا فيه جزء فضوا نفسكم واقعدوا ادعوا فيه، بلاش صدقة جارية تقليدية وسهلة ومش مستفاد بيها يعني المصاحف كتير في مصر أوي، وكل بيت فيه كتير فممكن نحط الفلوس في جامع بيتبني أو كرسى متحرك في مستشفى يستفادوا بيه المرضى أو دخول مياه لبيت غلابة أو بناء سقف لبيت فقراء، حاجات ناس تستفيد بيها لمدة طويلة.

واستكمل: دى نقطة مهمة أوي بالنسبة ليا، محدش يقول لحد بتعيط عليه ليه، ومتعيطش عشان هو بيتعذب!! الكلام ده غلط، سيبوهم يعيطوا لحد ما يطلعوا كل الشعور اللي عندهم ومفيش حاجة بتقول إن العياط معناه عدم رضا بقضاء ربنا "وأبيضت عيناه من الحزن فهو كظيم"، أهم حاجة تاني هي الدعاء وبس والصدقة، من فضلكم تكثفوا الدعاء وقت نزول القبر وتتصدقوا بأي حاجة بنية إن ربنا يجعل قبري روضة من رياض الجنة ويثبتني عند السؤال لأن ده أهم وقت ليا وياريت كمان بعد ما تدفنوني تقعدوا معايا شوية و تمشوا عشان تونسوني في ليلة زي دي، الموت علينا كلنا حق وإحنا كلنا أمانات ربنا وهيردنا تاني، فالحزن على الفراق هونوه على نفسكم بالدعاء ليا عشان أبقى في سعادة لحد ما أقابلكم تانى.

وأضاف: اللي بيحبوني يدعولي كتير عشان لو مفيش حد يدعيلي ودي مهمة أوي أوي أوي عاوز الكل يسامحني على أي حاجهة عملتها فيه بقصد لو بدون قصد.

واختتم وصيته :اللهم إن كثر موت الفجأة من حولي وكثر موت الشباب غفلة، ف يارب إن كنت أنا القادم فأحسن خاتمتي وارزقني نطق الشهادة عند الموت ويسّر طلوع روحي وهوّن عليّ سكراتي فإني أحب أن أرحل في هدوء وسكينة و طمأنينة، ولا تقبض روحي إلا وأنت راضٍ عني لكي أكون عبدا مقبولا عندك حتي أليق بلقائك العظيم و إن كان لي من العمر باقي فأغفر لي ذنوبي و معاصي نفسي الأمّارة بالسوء و أعفو عني و أمحو لي كل ما يعرقل طريقي إليك و ردّني إليك ردّاً جميلاً يارب العالمين.