هشام ماجد يكشف تفاصيل بداياته مع الثنائي شيكو وأحمد فهمي وسر الانفصال
كشف الفنان هشام ماجد، عن بداياته الفنية مع الثنائي شيكو وأحمد فهمي وذلك خلال حلوله ضيفًا على برنامج أسرار المُذاع عبر شاشة قناة النهار الفضائية.
وقال هشام ماجد: "لما عملنا فيلم ورقة شفرة كان كل واحد بيشتغل جنبه شغلانه مختلفة، وكنا سايبينها على الله، أول واحد ادانا فرصة هو محمد حفظي، وأول حاجة عملنها كان مسلسل أفيش وتقفيش وكنا بناخد في الحلقة على الكتابة 800 جنيه والتمثيل 300 جنيه".
وتابع:" وكان شيكو رافض الشغل معانا وعايز يفضل مهندس بس هو كان عنصر مهم جدًا وهو أقوى واحد فينا في التمثيل عشان كده مكناش عايزين نسيبه".
وعن سبب انفصالهم عن يعضهم، أوضح: "احنا صحاب من الجامعة ولما جينا نعمل الرجل العناب فيلم بعد نجاح المسلسل، اتفقنا ان أحمد فهمي هيكتب مع شريف نجيب عشان نتجنب المشاكل، ولما فهمي كتب الفيلم أناو شيكو كان عندنا اعتراضات ولما قولناها فهمي شاف إننا مش مقدرينه ودا عدم تقدير له فقفشنا على بعض وقررنا إننا مش هنعمل الفيلم وفهمي قرر إنه ينفصل ويشتغل لوحده".
وأضاف: "مفيش فرقة مبيحصلش بينها مشاكل ومحدش بيكمل وقليل اللي بيكمل يعني بيتلز وواما مثلا مكملوش، وبنتخانق أنا وشيكو بس مبتوصلش اننا ننفصل، وممكن نرجع نشتغل مع بعض احنا التلاتة عشان الجمهور بس، لكن مستحيل نبقى فرقة تاني لأن كل واحد اشتغل لوحده ونجح".
يذكر أن هشام ماجد شارك في رمضان الحالي من خلال مسلسل "أشغال شقة" وشاركه البطولة أسماء جلال، شيرين، سلوى محمد علي، مصطفى غريب، وآخرين ومن تأليف خالد وشيرين دياب، وإخراج خالد دياب.
