عمرو أديب يعلق على انتقاد الجمهور لـ شريف عامر بعد مداخلة عادل إمام: تصرف بإنسانية
حرص الإعلامي عمرو أديب على التعليق على الانتقادات التي تعرض لها الإعلامي شريف عامر، بسبب مدخلته مع النجم الكبير عادل إمام
وقال خلال تقديمه برنامج "الحكاية" المذاع عبر قناة MBC مصر: موضوع زميلنا شريف عامر والزعيم عادل امام .. ناس كتيره اتكلمت عن تقييمهم للاداء الاعلامي عامل ازاي وشريف عامل ازاي وشريف كلم الزعيم ازاي، أنا بقى بتكلم وبوضحلك "دي شغلتي" وايه الصح وايه الغلط .. وهقولكم على سر الشغلانة .
وتابع: المذيعين نوعين، نوع يحسب الاشياء بشكل دقيق، ونوع مبيحسبش حاجه خالص.. لا ده صح .. ولا ده غلط .. بمعنى ايه؟ انا سألت: "الناس اللي عند عم عادل امام في البيت بيتكلموا مع شريف في التليفون وقالوا إحنا بنكلم شريف، وقالهم أدوني أكلمه".
وأضاف: فعادل أمام دخل على الخط أنا مكلمتش شريف عامر، ولكن أنا عارف شريف بيفكر إزاي .. فكر أنه مش عايز يضغط على الراجل .. واقولكم جملة محدش عايز يقولها( يخليه يقول حاجه مش حلوة ) .. شريف مش انه مش عايز يسأله .. احنا نكرلك لعادل امام 20 سؤال و 100 .. انما شريف كان "مقدر ان الراجل داخل معاه يوم عيد ميلاده وانه مش عايز يضايقه .
واستكمل: في مذيع تاني معندوش المشكلة دي وميحسبهاش ..في مذيع ممكن يبقى معاه مصدر عايز يعصره .. وحد تاني كان سعيد انه معاه ومش عايز يطول عليه ومش عايز يبقى بايخ .. ده اللي عمله شريف.
وواصل: أنا قعدت سنين الزعيم عادل إمام يكلمني بالليل في البرنامج مساء الخير يا عمرو أقوله مساء الخير يا زعيم يقولي أنا داخل أنام بقى مع السلامة.. وبقى افيه بعد كده.
واختتم حديثه في هذا السياق: شريف عامر قرر يكون ظريف ولطيف وإنسان في مكالمته مع الزعيم بس دي كل الحكاية في حد تاني ولا يفرق معاه ويبقى عايز يعصره .. شريف معملش كده .
وكان الجمهور انتقد شريف عامر، بعد مداخلة تليفونية مع الزعيم عادل إمام، لتهنئته بعيد ميلاده، مع الفنانة لبلبة والفنانة يسرا.
وخلال المداخلة ذكر شريف عامر أن عادل إمام له الفضل في تعليم 2 من بناته اللغة العربية، ورد عليه الزعيم مازحا: "أنت عايز تقولي إنك ابن ناس وبناتك ميعرفوش عربي".
آخر أعمال عادل إمام
يذكر أن آخر أعمال عادل إمام مسلسل "فلانتينو" الذي عرض عام 2020، الذي دارت أحداثه حول رب أسرة يجسد شخصيته الفنان عادل إمام لديه 3 أبناء، ويمتلك هو وزوجته دلال عبدالعزيز مجموعة مدارس دولية، ومع تصاعد الأحداث يتزوج من امرأة شابة تصغره بسنوات وتنشب خلافات بينه وبين زوجته الأولى.
وشاركه بطولة مسلسل "فلانتينو" كل من الفنانة الراحلة دلال عبد العزيز، وحمدي الميرغني، ومحمد الكيلاني، وطارق الإبياري، وهدى المفتي، وسليمان عيد، وبدرية طلبة، ورضا إدريس، ووفاء صادق ورانيا محمود ياسين، وآخرين، وهو من تأليف أيمن بهجت قمر، وإخراج رامي إمام.
