”ايه شغل كيد النسا ده”.. عمرو أديب يعلق على انتقادات الجمهور لـ منى زكي بسبب بوستر ”تحت الوصاية”
علق الناقد طارق الشناوي، على انتقادات الجمهور للفنانة منى زكي عد إطلاق بوستر مسلسلها الجديد "تحت الوصاية" المقرر عرضه في رمضان المقبل.
وقال عمرو أديب خلال برنامج الحكاية المذاع على قناة mbc مصر: "منى زكي طالعة في الأفيش محجبة ومفيش أي حاجة فيه تضايق لا مثلا متبهرجه ولا أي حاجة، وتلاقي الهجوم غير طبيعي، ولاحد يعرف المسلسل فيه ايه ولا منى دورها ايه وبيعلقوا على حواجبها وليه واحد محجبة تطلع حواجبها كده، ولو طلعت حلوة وعاملة حواجبها هيتقال هو في محجبة هتعمل حواجبها كده، هو إيه شغل كيد النسا ده؟.
وتابع: منى زكي ست محترمة ومتجوزة راجل محترم، عمرنا ما سمعنا عنهم حاجة وحشة، مفيش شيء سيئ يخلي التربص بمنى زكي كده.
وأضاف: احنا مش هنتكلم عن المحجبة حلوة ولا وحشة النهاردة هما زي كل البشر فيه منهم الحلو والوحش، ومتأكد إن الحجاب فرض بسل لو عملنا مسلسل فيه واحدة محجبة شريرة اي المشكلة، هو مفيش فيهم شرير خالص.
واستكمل: كل مجموعة من أصحاب الريات يطلعوا يهاجموا طيب وبعدين هنعمل دراما ايه؟ المسلسل اللي هنعمل هيكون ايه اذا كان كل شئ عليه علامة حمرة محدش يقرب من الشيوخ والمحجابات والريف ورجال الأعمال، وغيرهم مع إن كل يوم في المجتمع المصري بنشوف سلبيات عادي.
وواصل: منى زكي نموذج محترم إي الثورة اللي حاصلة دي اتفرج على أول حلقة واطلق المدفعجية بتاعتك زي مانت عايز، إمال لو كانت لابسة حاجة تانية كنتوا عملتوا ايه، كل عمل نعمله تطلعوا تهجموه إمال المفروض هنعمل دراما ايه؟ بشويش شوية وخلونا ناخد نفسنا واتفرج على أول حلقة واطلق المدفعجية بتاعتك زي مانت عايز.
واختتم عمرو أديب حديثه: ده ترصد واستقصاد وتوحش ومستخسرين تشوفوها بالحجاب وانتوا عارفين انتو بتعملوه ليه وعشان ايه.
أبطال "تحت الوصاية"
يشارك في بطولة "تحت الوصاية"منى زكى، ودياب، نسرين أمين، ورشدى الشامى، مها نصار، خالد كمال، محمد عبد العظيم، تأليف خالد وشيرين دياب، وإخراج محمد شاكر خضير، يتكون العمل من 15 حلقة، ويعرض في رمضان على قناة dmc.
