كاملة أبو ذكري تتراجع عن اتهامها لممثلي 100 وش بالغرور.. كنت قاسية
بعد إثارتها للجدل الذي سببته المخرجة كاملة أبو ذكري، مؤخراً حينما هاجمت عددا من ممثلي مسلسل "ب100 وش" دون تحديد أسمائهم واتهمتهم بالغرور، ليردوا عليها عدد منهم،إلا وعادت واعتذرت المخرجة للفنانين التي اتهمتهم بالغرور من خلال بوست نشرته على فيس بوك.
وقالت فيه "أحب اعترف إني انفعلت وكنت قاسية جدا في كلامي، ولو صدر تصرفات من شخص أو اتنين خلتني أحس بالغضب ده، ده ممكن يكون نابع من قلة الخبرة مع التعامل مع جمهورعريض، ومع النجاح الكبير وارد إن أي حد يتعرض للهزة دي، ولو كنت قاسية ده نابع من حبي ليهم وخوفي عليهم، علشان أنا شوفت حجم موهبتهم لما اشتغلت معاهم".
أضافت مخرجة مسلسل "بـ100 وش": "وأتمنى إن الشخصين اللي كنت بعنيهم يفهموا كلامي، ويعرفوا إني مستخسرة موهبتهم، وأنا متأكدة إنهم هيفهموني لأنهم الاتنين دول تحديدًا عارفين أنا أد إيه بحبهم وبقدرهم".
وكانت المخرجة كاملة أبو ذكرى قد انتقدت عددا من ممثلى مسلسلها بـ 100 وش بسبب تصرفاتهم عبر حسابها على فيس بوك.
وكتبت كاملة أبو ذكرى فى وقت سابق: "عرفت وسمعت واتأكدت أن بعض الممثلين المبتدئين من مسلسل بـ 100 وش بعد النجاح الفظيع المريع لمسلسل بـ 100 وش شافوا نفسهم والغرور سيطر على تصرفاتهم عايزه أقولكم خساره الغرور مقبرة الفنان زى ما قلنا يوسف شاهين ده أنتم لسه الناس ما تعرفش أساميكم الحقيقية وبتشاور عليكم باسم الشخصية اللى قدمتوها".
وتابعت: "الغرور ممكن يقتلكم وغرور ليه، أنتم مين أصلا كلنا مين أصلا.. دكتور مجدي يعقوب متواضع ولما تتكلم معاه بيحط راسه في الأرض مجدي يعقوب بجلالة قدره وربنا يهدي".
مسلسل بـ100 وش، عرض في رمضان الماضى ومن بطولة نيللى كريم و آسر ياسين، وعلا رشدى ومصطفى درويش وإسلام إبراهيم، و زينب غريب و دنيا ماهر وعدد كبير من الفنانين، تأليف أحمد وائل وعمرو الدالى، إخراج كاملة أبو ذكرى.
