”مش بوست تصفية حسابات”.. ريهام حجاج توضح كواليس رسالتها
في خضم الجدل الكبير اللي سيطر على السوشيال ميديا بعد نهاية موسم رمضان الدرامي، وتحديدًا مع تصاعد النقاشات حوالين "مين ترند ومين لأ"، خرجت الفنانة ريهام حجاج عن صمتها ووضّحت موقفها من منشور أثار الجدل بشكل واسع.
المنشور اللي نُسب إليها كان بيحمل نبرة روحانية وإنسانية، وقالت فيه:"افرحوا لبعض وحبوا الخير لبعض... كل النعم إيجار مفيش فيها حاجة ملكك أصلاً، واللي بيدفع إيجار نعمك هي نيتك ونضافة قلبك...".
ومع انتشار البوست، بعض المتابعين فسّروه على إنه رد غير مباشر على التنافس في نسب المشاهدة والتريندات، وخصوصًا مع الحوارات اللي حصلت بين النجوم بعد انتهاء السباق الرمضاني.
لكن ريهام قطعت الشك باليقين، وفي تصريحات صحفية، أكدت إنها نشرت الكلام قبل العيد كنوع من النصيحة والموعظة لجمهورها بمناسبة شهر رمضان، وماكانش لها أي نية إنها تدخل في صراعات أو ترد على أي طرف.
وقالت:"أنا ماحبش أزج بنفسي في أي صراعات أو أتكلم على حد، أنا كتبت المنشور كرسالة حب وسلام، مش تصفية حسابات. دا كان كلام من القلب".
وختمت ريهام حديثها: "المنافسة جميلة لما تكون بروح حلوة، لكن الخير الحقيقي هو إننا نفرح لبعض ونحب الخير للكل".
ريهام حجاج في رمضان 2025
شاركت في بطولة مسلسل "أثينا" اللي عرض في النصف الأول من الموسم الرمضاني، وحقق نسب مشاهدة ، وشاركها في العمل نخبة من النجوم أبرزهم: أحمد مجدي، عمر السعيد، سوسن بدر، ومحمود قابيل، ومن إخراج يحيى إسماعيل.
