زوجة رامي صبري تشن هجوماً حاداً على ويجز: لو هو رقم 19 فأنت مش موجود على الخريطة
خرجت شيرين عادل زوجة الفنان رامي صبري للرد على الهجوم الذي قام به مغني الراب ويجز على رامي صبري، بعد تصريحاته الأخيرة خلال لقائه ببرنامج "حبر سري" الذي تقدمه الإعلامية أسما إبراهيم.
وشاركت شيرين عادل جزءًا من حديث رامي صبري الذي تسبب في هجوم ويجز عبر حسابها على إنستجرام وعلقت كاتبه: "ده جزء من الحلقة اللى رامى اتكلم فيها عن الراب.. ومن هنا ورايح مش هسكت وهرد على أي حد يفكر يتكلم عنه تاني بأي طريقة مش عجباني".
وتابعت: أولاً رامي اتسال سؤال في برنامج ورد وعنده كل الصلاحية لأى رد أو إجابة على أي سؤال يعني مفيش اي مانع يخلي رامي لما يتسأل سؤال ميجاوبش.
وأضافت: وثانيا رامي صبري ده يا حضرت فنان من أهم الفنانين فى الوطن العربى ومن أهم الأصوات، ده لو حضرتك مش معانا في مجال المزيكا، وبعدين والله يا ريت رامى عنده الوقت بتاع حضرتك الفاضى اوى بتاع 5 شهور فاضى يا ريت كنا نتمنى.
وواصلت: أما بقى موضوع رامي رقم كام ده هو الحقيقة مش شاغل بال رامى أوي بس لو حضرتك شايف إن رامي رقم 19 مع الأسف الشديد لازم أقول لحضرتك تبقى أنت مش موجود على الخريطة من الأساس".
واستكملت: أغنية واحدة من رامى صبرى واحدة بس تعمل تاريخ لناس، محتاج تذاكر كويس وتعرف انت بتتكلم عن مين، قبل ما تتكلم لأنك واضح إنك عندك شغل تانى غير المزيكا لأنك لو جوة الشغلانة كنت مش هتقول ولا كلمة من الكلام دة علشان الناس متضحكش عليك لأنك اتكلمت عن فنان بجد مش جاى يهزر.
واختتمت : واخيراً لما تحب تعمل دعاية لأغنيتك الجديدة ابعد عن اسم رامى صبرى أنا عارفة إن اسمه ممكن يخلى الأغنية ترند بس حاول الأغنية بتاعتك الجديدة تعتمد فيها على نفسك.
ويجز يسخر من رامي صبري: أنت رقم 19
و كان ويجز رد على تصريحات رامي صبري في فيديو من خلال خاصية القصص القصير بحسابه عبر"انستجرام"، قائلا :هتكلم على فنان فاكر إنه عنده الصلاحية إنه يطلع يتكلم عن أي حد في أي وقت والناس تسمع وتسكت.. الفنان دا اسمه رامي والفنان دا كل ما بيقعد من 4 لـ 5 شهور يزهق ويطلع يتكلم على بتوع الراب في التليفزيون، هتكلم امتى على بتوع البوب اللي أنت منهم واللي في مجالك أنا شايف مبتفهمش في الراب حاجة زى ما أنت قولت قبل كدة ومش هتعرف تعمله، أنا راجل لو لقيت حد بيعرف يسوق عجلة وأنا ما بعرفش، بحترمه لأنه اشتغل على نفسه في حاجة أنا ما اشتغلتش عليها.
وواصل: وأنت كدة مبتقدرش الفنانين وفاكر أن هما عايزين يوصلولك وهما اصلا معدينك بكتير أنت رقم 19 مثلا يا رامي أنت بعيد أوي.
وأتم حديثه بالإعلان عن أغنيته الجديدة المنتظرة في السابع والعشرين من الشهر الحالي، ساخراً: استنوا الأغنية الجديدة، ورامي ممكن يشرح لنا الأغنية دي بعد ما تنزل لو فهمها.
