صبحي كابر يكشف اللغز وراء بيع مطعمه الشهير
أثارت الصفحة الرسمية لمطعم صبحي كابر على موقع التواصل الاجتماعي "فيس بوك" الجدل بعد ردها على أحد عملاء المطعم، برسالة غامضة وكأنه الوداع الأخير.
وردت الصفحة على رغبه أحد العملاء في زيارة المطعم هذا الأسبوع :" تم بيع المطعم لظروف قهرية، المطعم غير تابع للحاج صبحي في الوقت الحالي، وسيتم الإعلان عن باقي التفاصيل قريبًا".
وتفاعل الآلاف من جانب عشاق مطعم صبحي كابر ورواده على تلك الرسالة معبرين عن حزنهم الشديد، متسائلين عن لغز بيع المطعم رغم الإيرادات المرتفعة التي يحققها يوميًا.
حقيقة بيع مطعم صبحي كابر
وبعد ساعات، خرج الحاج صبحي السيد عطوة صاحب مطعم صبحي كابر لتوضيح القصة الكاملة بشأن بيع المطعم.
وقال صبحي كابر في تصريحات صحفية: قمت ببيع المطعم بعد ديون وصلت لأكثر من 75 مليون جنيه، فضلا عن تراكم فوائد بقيمة 50 مليون.
وفي التفاصيل، أوضح كابر: ظهري شخص بيبيع الذرة بسعر 4 جنيهات للكيلو، وأنا بجيب ذرة لتسمين وكعلف للمواشي التي تتواجد في مزرعتي، وممكن أجيب 500 طن ذرة، والمرزعة فيها 4 أو 5 آلاف رأس.
وتابع: الشخص ده قالي أن الذرة هتغلى وسعرها هيرتفع يوصل 6 جنيهات للكيلو عشان كانت لسه الحرب الروسية الأوكرانية في بدايتها، يعني هنعمل فلوس أد كده، وأنا طمعت وكان معايا قرشين وبعت ذهب زوجتي وبعض الممتلكات واستلفت فلوس من جماعة أصدقاء لي، ودخلت في موضوع مركب الذرة و دفعت الفلوس للشخص ده.
وأضاف: فضلت مستني الذرة ييجي بكرة ييجي بعده، طلع ناصب على نص مصر كلها وخلع وراح دبي، قلبت عليه الدنيا، معرفتش أوصل له من الآخر، المهم خدت من الناس فلوس كتير، والمحل بعدها اتحرق وقامت حريقة، احتجت فلوس تاني عشان أوضب، وكان علي فلوس، وكانت مرحلة قاسية جدا.
وواصل: ودخلت في الشغل واستلفت، وصلت لـ 75 مليون جنيه سلف من الناس، عملوا فائدة بقوا 125 مليون جنيه، وبعدها عرضت المحل للبيع، كلمت صاحب براند شهير"حضرموت عنتر" في المطاعم عشان يشتري المحل، وكان لهم فلوس عندي، دخلوا وخدوا المحل، واتفقنا وعملوا شركة سموها الأكابر رغم إن شركتي اسمها الكابر، واختلفنا روحت اتخانقت معاهم.
وأكمل: اتفقت مع أصحاب المحل الجداد ياخدوا لحمة للمحل من عندي، بقى يجيب نص اللحمة من برة والنصف الثاني مني، وقالي متتدخلش، وبقيت كومبارس في المحل، أروح أعمل فيديوهات ليهم، وبقيت شغال معاهم، عشان عندي دورة للمزرعة، وقلت ربنا له حكمة، يذل من يشاء ويعز من يشاء، مش مهم وعادي، المهم صحتي وعيالي وخلاص.
واستطرد: الشغل استمر معاهم لحد العيد وكنت بدبح 100 عجل، وأديهم اللحمة بـ260 جنيها للكيلو "متشفي"، وهم يبيعوها بـ360 جنيها، وجه بعد العيد بقى يجيب لحمة وخامات من برة، أنا متفق معاك على عقد إدارة، قطع مني اللحمة وحتى الخضروات، وأنا عامل كل ده عشان المحل، وبقى يشتري من برة، ويقعدوا يفاصلوا معايا.
وعن الصفحة الخاصة بالمحل على "فيس بوك": الصفحة دي بتاعتي أنا قمت واخدها وقفلت تليفوني وقولتله هفتح محل لي.. ده كل اللي حصل، ودي الحقيقة.
جدير بالذكر أن مطعم صبحي كابر ضمن أقوى 150 مطعم على مستوى العالم، و يتميز بخلطات مميزة في المشويات وأكلات المطبخ الشرقي، مما جعل الآلاف من مرتادي المطعم يرتبطون به وجدانيا ويداومون على التردد عليه.
