كندة علوش: أثناء علاجي من السرطان عرفت أن أمي مصابة بنفس المرض

قالت الفنانة كندة عالوش، أنها أثناء رحلة علاجها من سرطان الثدي اكتشف أن والدتها مصابة بنفس المرض.

وأوضحت كندة خلال حديثها في بودكاست مع الإعلامية منى الشاذلي عبر قناتها على يوتيوب: : أي حد عارفني، عارف علاقتي بأمي هي صاحبتي وأمي وسندي وربنا يارب يحميها ويخليها، ومن يوم ما خلفت وانا معتمده على ماما بتساعدني طول الوقت وشايله معايا تقل كبير، والحقيقة ان الكسرة الحقيقة كانت بعد شهر بالظبط اكتشفت ان ماما عندها نفس المرض يمكن في مرحلة مختلفه بس دي كانت الصدمة.

وتابعت: أنا مكنتش باخدها معايا العلاج عشان مش عايزاها تبقى زعلانه، فـ لما لقتها مره شاكه انها تعبانه وروحنا عملنا فحص واتأكدنا عندها الورم، وقتها كانت الخبطة اللي مش عارف استوعبها بس وحياة ربنا وحياة غلاوة عيالي وجوزي .. مفيش ثانية قولت ليه يارب أنا وأمي نفس الوقت .

وأضافت: كل اللي عليا قولت ربنا عايز يقولي خدي بالك من صحتك أكتر عايز يقولك خلي بالك من النعمة اللي ادتهالك .. وسيبك من الجري ورا الحياة .. وخلي بالك من نفسك ومتهمليش النعمة اللي ربنا اللي ادهالك

واستكملت: فـ بقيت اخد ماما ونروح ناخد علاج الكيماوي مع بعض يمكن انا شعري موقعش بشكل كامل بس ماما لأ فـ ده حز في نفسيتها اوي، انا بطبيعتي مكنتش بخاف بس ماما لأ قلوقة أنا اللي كنت بقوي ماما، ماما بتخاف من الحقن وتتوتر وتزعل وتتوجع، أنا لا، مجتش على حقنة، الواحد لما بيدخل الرحلة دي هيبقى صاحب الحقن، هي جزء من روتينك اليومي .

واتمت: وكنت كل ما بصحى بشكر ربنا على النعمه دي .. في ناس بتقول ابتلاء وناس تقول مرض ولكن والله ولا لحظه عمري شوفتها بالشكل ده يمكن صحيا تعاملت معاه انه مرض ولكن من جوايا كنت بحمد ربنا طول الوقت على انه ميزني .. يمكن ربنا عايز يعلمني حاجه .. مهو اللي بيعلمنا مش بس الحاجات الحلوة لا بنتعلم من ضعفنا ووقعتنا كمان فـ حسيت اني مدينة لربنا اني احمده طول الوقت لأن اكيد اللي فيا اخف 1000 مره من ملايين جالهم نفس الحالة بس ظرفهم اصعب مني .. الحمدلله.