ماجد الكدواني: كريم عبد العزيز ده حبيبي و لو قلع جزمته وضربني بيها هسامحه
![ماجد الكدواني و كريم عبد العزيز](https://media.elamwal.com/img/24/04/02/244602_1712048253.jpg)
تحدث الفنان ماجد الكدواني، عن علاقة الصداقة القوية التي تجمعه بالفنان كريم عبد العزيز.
وقال ماجد الكدواني خلال لقائه مع الإعلامي عمرو أديب في برنامج "بيج تايم بودكاست" المذاع عبر قناة MBC: "كريم عبد العزيز ده حبيبي، اللي بيعجبني فيه الأمانة والمصداقية اللي من القلب للقلب وساعات نقعد أنا وهو نتكلم مع بعض ويقول لي يا أخي مش فاهم الناس بقت عاملة كده ليه؟ هو إحنا شكلنا غريب قدام الناس ليه؟ هو حاجة غريبة اتنين بيحبوا بعض لله في الله؟".
وتابع: "ساعات بنقعد نتكلم في التليفون 8 ساعات، وساعات بنبقى فعلا محتاجين نتكلم مع بعض وجعانين مصداقية ونتكلم براحتنا، بدون رقابة وقدامك كتاب صاف".
وأضاف: "سر علاقتي بكريم عبد العزيز اننا بنحب بعض بجد ونغلط ونتعاتب محدش هيمسك على حد حاجة، أنا وهو بنتكلم في الحياة بعيد عن المهنة خالص، صداقتنا عمرها 24 سنة من سنة 2000 والحمد لله مفيش بينا مشاكل، ربنا يديمها نعمة ويبعد عننا العين هو إنسان جميل وقلبه صافي ودايما يقولي احنا مصروفين لبعض ومراتي تقولي ربنا يبعد عنكم العين، إحنا شفنا وعدينا بتجارب وظروف كتير".
وواصل: "كريم عبد العزيز لو في يوم اتنرفز وزعل وقلع جزمته وضربني بيها هسامحه، يعلم ربنا أنا لو عمل فيا إيه لا يمكن أزعل إلا ده، إحنا بنحب بعض بجد بنغلط ونتعاتب ونتصالح ومحدش يبقى ماسك على حد حاجة، إحنا أصحاب برا المهنة بنتكلم عن الحياة".
أخر أعمال ماجد الكدواني
يذكر أن آخر أعمال ماجد الكدواني فيلم "أبو نسب" وهو بطولة محمد إمام، ياسمين صبري، وفاء عامر، هالة فاخر، محمد ثروت، محمد لطفي وعدد آخر من الفنانين، ومجموعة من ضيوف الشرف، والفيلم من تأليف أيمن وتار وإخراج رامى إمام، ومن إنتاج سينرجي، ماجيك بينز، أوسكار، نيو سنشري، مصر العالمية، فيلم سكوير.