مي عمر: في فنانة بتدفع لناس فلوس عشان يهاجموني
تحدثت الفنانة مي عمر عن تعرضها لحملات ممنهجة من الهجوم من قبل زميلة في الوسط الفني.
وقالت مي عمر خلال استضافتها في برنامج أسرار لأميرة بدر المُذاع عبر شاشة قناة النهار الفضائية: "عرفت الشخصية اللي بتهاجمني وهي فنانة لكن مش عايزة أصرح عنها والحاجات دي بتبقى معروفة وبيبقى معروف هي مين".
وتابعت:" وناس من اللي قبضتهم فلوس عشان يهاجموني قالولي لكن بحاول أركز في نفسي وشغلي، هي كانت في الأول بتضايقني زمان لأني بلاقي كلام غريب ومش مفهوم، لكن بطلت ولقيت ربنا بيعوضني بحاجات حلوة وفي الآخر نجاحي هو اللي بيرد ومهما حصل هجوم ومهمت اتأجر ناس بيبقى أصغر من النجاح".
وعن سبب عدم مهاجمتها للفنانة التي تهاجمها بنفس الأسلوب، أوضحت: "ربنا يكرمها في شغلها ومعاها، أنا بحس إن دا شر بين ولو عملت كده ربنا عمره ماهيكرمني، ودي أسهل حاجة ممكن نعملها عشان نعلي نفسنا بيها".
وأضافت: "بحب أشوف نقد الناس وردود أفعال الشارع أكتر، عمري مابسد ودني عن النقد ومش كل حاجة أقول دي لجنة بالعكس أوقات بقول يمكن دا حقيقي وبحب أقرأ النقد الحقيقي وبقول يمكن فيه حاجة مفيده ليا وفيه نقاد معينين بحب أسمع رأيهم ومنهم الأستاذ طارق الشناوي بحبه جدًا ولما بيتكلم عليا في حاجة كويسة أو حاجك وحشة بحب أسمعها وأستفيد منها، ومن ناحية تانيه في نقد مبالغ فيه جدًا مش نقد على قد ماهو شخصنة فلازم نكون منطقيين في النقد وندي كل حد حقه مش ننقد بدون مبررات".
يذكر أن مي عمر تشارك في دراما رمضان 2024 من خلال مسلسل "نعمة الأفوكاتو" ويشاركها البطولة أحمد زاهر، أروى جودة، سلوى عثمان، سامي مغاوري، لبنى ونس، عماد زيادة، هدير عبد الناصر، غادة فلفل، أحمد ماجد، ولاء الشريف، محمود غريب، ومن إخراج محمد سامي.
