تامر حبيب يعرب عن سعادته بإعادة عرض فيلم ” حب البنات” في سينما زاوية
أعرب السيناريست تامر حبيب عن سعادته الشديدة بإعادة عرض فيلم " حب البنات"، الذي عرض عام 2004، في سينما زاوية، وذلك بمناسبة عيد الحب .
وكتب تامر حبيب عبر حسابه الشخصي على موقع” فيسبوك”: لسة راجع من سينما زاوية المحببة لقلوب كل اللي بيحبوا السينما كانوا عاملين عرض لفيلم حب البنات بمناسبة عيد الحب ومشكورين جدًا طلبوا مني اروح احضر الفيلم وعملولي لقاء مع الجمهور بعد الفيلم ما خلص .
وتابع : الجمهور اللي كان مالي كل كراسي القاعة ومافيش كرسي فاضي كانت طبعًا أغلبيتهم العظمي من البنات ويمكن ٩٠٪ منهم كانوا اطفال أو لسة ماتولدوش لما الفيلم اتعرض اول مرة في ٢٠٠٤.
وأضاف: أنا راجع من العرض ده طاير من السعادة والبهجة وحاسس بنشوة لا تضاهيها نشوة الشباب كانوا بيسمعوا الحوار مع الفيلم وهو شغال، وكانوا بيصفقوا مع ظهور الممثلين كأننا في مسرح و بيغنوا ويرقصوا مع كل كلمة في كل اغنية في الفيلم وفاجئوني بتصفيق مدوي بعد الفيلم ما خلص كأنهم كانوا في مسرحية لعادل امام.
وختتم منشوره: مهما وصفت، مش هقدر اعبر عن شعوري اللي حسيته من اول الفيلم ما بدأ لغاية دلوقتي حالًا وروح وبهجة وطاقة الشباب وهما بيحاوروني بعد الفيلم كانوا مخليني عايز اسجد شكرًا لربنا علي إنه انعم. عليا النهاردة بإحساس ماحستوش من زمااااان، أنا كنت قاعد وسط مجموعة من الشباب فاتحين عليا هويس حب وبهجة بجد ماتتوصفش…. شكرًا جدًا لكل واحدة وواحد خلوني احس بسيل المشاعر ده، وشكرًا لصاحبة فكرة عرض الفيلم النهاردة من اسرة سينما زاوية، وفي عيد الحب بعد عشرين سنة من عرضه… وشكرًا يا سينما انك عندك كل هذا السحر… وشكرًا يا امي علي دعائك ليا ان ربنا يحبب فيا خلقه، واحب اطمنك يا ماما ان ربنا استجابلك من وسع… والف شكر وحمد ليك ياارب “.
فيلم حب البنات
يذكر أن فيلم حب البنات إنتاج عام 2003، وعرض عام 2004، وهو من بطولة خالد أبو النجا، وليلى علوي، وأحمد عز، وحنان ترك، وهنا شيحة، وأحمد برادة، وسوسن بدر، وعبدالرحمن أبو زهرة، ودعاء طعيمة، وتأليف تامر حبيب، وإخراج خالد الحجر.
