بعد تصريحاتها المثيرة عن تامر حبيب.. إيناس الدغيدي: أنا ضريته من غير ما أقصد و هو في حالة نفسية سيئة
أثارت المخرجة إيناس الدغيدي حالة من الجدل الواسع بعد تصريحها الأخيرة عن السينارست تامر حبيب، خلال ندوة صحفية شاركت فيها، مما عرضه لهجوم شرس على السوشيال ميديا.
وخرجت إيناس الدغيدي عبر مدخله هاتفيه لتوضح أن تصريحاتها عن تامر حبيب بشأن ميوله تم فبركتها من قبل بعض الناس، وقالت: "أنا صاحبة فكر أكتر من إني أكون تقليدية وأنا بتكلم في أفكار عامة لكن عمري ما أتكلمت في أفكار خاصة لحد ولما بتكلم عن أفكار عاملة لشخص ممكن تتاخد بشكل تاني".
وتابعت خلال استضافتها في برنامج "حديث القاهرة" الذي يقدمه الإعلاميان خيري رمضان وكريمة عوض عبر قناة القاهرة والناس: وأحنا المفروض بنتقبل الشخص كما هو ونتقبل جميع الجهات والاساليب وممكن منفذهاش وانا مش بعيب على حد ولا بتكلم على زميل من زمايلي اللي انا بحترمهم.
إيناس الدغيدي: لا يمكن اشكك لحظة في أخلاق تامر حبيب
وأضافت: تامر حبيبنا وكل الوسط الفني بيحبه على المستوى المهني والشخصي لأنه إنسان مبهج والبهجة دي بتعملنا كل حاجة حلوة معاه وأحنا كلنا صحاب وأنا لا يمكن اشكك لحظة في أخلاق تامر حبيب .
واستكملت:"أنا عملت حديث من شهر ونصف نزل على الموقع كامل ومحدش اتكلم عنه، فوجئت بعد شهر ونصف بتقطيع حديثي في الجزء الخاص بتامر حبيب، وتوجيه اتهامات له لم أتهمه بها، لدرجة إضافة ضحكة لم تكن موجودة، ولا يمكن أن أعيب على زملائي الذين أحترمهم، وتامر حبيب محبوب من كل الوسط الفني لإنه إنسان مبهج".
وأوضحت: السوشيال ميديا دلوقتي بيعملوا حاجات غريبة وأصبحوا مخرجين ومونترين وبنشوف حاجات غريبة مش عارفة ازاي اتعلموها وركبوا حديث ملوش علاقة باللي أنا قولته.
إيناس الدغيدي: انا ضريت تامر حبيب من غير ما أقصد
واستطردت: الهجمة اللي كانت على السوشيال ميديا كانت دمها تقيل جدًا وأنا اتعودت طول عمري على الهجوم عليا لكن المرة دي كانت على زميل ليا ومحترم ده اللي ضايقني وانا ضريته من غير ما أقصد.
وعن رسالتها التي نشرتها عبر حسابها بأحد مواقع التواصل، ترفض فيها أي حديث عند حضورها مهرجان القاهرة السينمائي: "كنت عارفة إن كل الناس هيسيبوا الحدث المهم في مصر وألاقي مواقع خايبة بتتكلم في الموضوع".
إيناس الدغيدي: تامر وضعه أصبح صعب ولا يعرف كيف يتصرف
وتابعت حديثها: "تامر تعرض لهجمة شرسة، وضايقني إني أضريت به دون قصد، لكن هو كلمني من أول يوم، وقال إنه متأكد من نيتي وقصدي، لكن وضعه أصبح صعب ولا يعرف كيف يتصرف".
وكشفت إيناس الدغيدي عن الحديث الذي دار بينهما حول حضور افتتاح مهرجان القاهرة السينمائي الدولي بالأمس قائلة: "قلتله تعالى ندخل المهرجان، قال مش عايز سؤال سخيف، والولد في حالة وحشة وده حقه، لإن الهجمة أخلاقية، وأقول للسوشيال ميديا عيب نعمل تريند على حساب الناس".
رسالة إيناس الدغيدي لمن فبرك تصريحاتها:حرام التريندات تبقى على حساب ناس
وقامت إيناس بتوجيه رسالة لمن قام بفبركة الفيديوهات: بقول لكل اللي كتب على السوشيال ميديا حرام عليكوا أن أحنا نضيع شخص عشان خاطر أنتوا عايزين تعملوا تريند وحرام التريندات تبقى على حساب ناس، وبقول لكل الناس أن مش كل كلمة بتتقال على السوشيال ميديا صح ودلوقتي كله بيألف ويخرج ومش صحيح وحاجة سخيفة ولازم يبقى فيه عقاب للناس دي.
