حمو بيكا لمنتقدي سبوع ابنته: أنا متولدتش في بوقي معلقة دهب
خرج مطرب المهرجانات الشعبية حمو بيكا للرد على منتقدي عقيقة ابنته تاج " الذي أقامه خلال الأيام الماضية في إحدى قاعات الأفراح.
وقال حمو بيكا خلال بث مباشر عبر موقع التواصل الاجتماعي فيسبوك:"سيبوا الملك للمالك، والكلمتين دول للقريب قبل الغريب، أنا شخص طالع من منطقة شعبية اسمها الدخيلة من أسرة متكونة من أربع أخوات والأب والأم يعني 6 أنفار وكنا قاعدين في أوضة وصالة والحمام جوه المطبخ".
وتابع : "أبويا على باب الله بيسافر ويتغرب ويشقى علشان اللقمة اللي بناكلها بالحلال وأنا ما دخلتش مدرسة وما اتعلمتش بس اشتغلت وشقيت واتغربت كتير وأنا صغير، وعمري ما مديت إيدي على حاجة مش بتاعتي وكنت بقول يا رب أكرمني وأبقى حاجة لأهلي".
وأضاف : "أنا متولدتش في بقي معلقة دهب وكنت بحب الخير لكل الناس ولحد دلوقتي".
وواصل: ربنا كرمني بشمس الإنسانة اللي بحبها ومتجوز من 3 سنين وداخل في الرابعة، وربنا رزقني بمولودة بعد 3 سنين وسميتها تاج وقلت ندرًا عليا هعمل لها سبوع العالم كله يتكلم عنه.
واستكمل: حوار الدهب اللي مراتي لابساه مش جديد، وفي واحدة معرفهاش اتكلمت وهسمعكوا كمية الحقد والغيرة والنفسنة ومش هي لوحدها اللي بتتكلم بصفار وغل ولو دي حفيدتها أو بنتها وهي قادرة هتعمل أكتر من اللي أنا عملته وأنا معرفهاش وشفت من ده كتير وشفت غل من ده كتير مش فاهم ليه وبتقول مراتي لابسة خمسة ستة كيلو دهب.
وأضاف: أنا فرحت ببنتي وعملت عقيقة ودبحت لها وعملت السنة اللي المفروض تتعمل، وطلعت لحمة وأكلت وعلى طول مش في العقيقة بس، ولكن أنا كنت نادر أعملها الليلة دي، لأني جاملت كتير وأخواتي اللي نوروني ونجوم مصر كلهم جم يجاملوا حمو بيكا وعملت لها ليلة واتقال لو اتجوزت هتعملها إيه هعملها ليلة ويا رب أنتي تعيشي علشان تشوفيها.
واستطرد: عاوز أقول لكل واحد قريب ما تتصلش بيا تطلب مني شيء علشان أنت معاك اللي يديلك وبتطلب ببجاحة أنا مش هديك حاجة، هي الحاجة غصب ما تطلبش ببجاحة وقلة أدب، وخفوا شوية أنا عملت سبوع بنتي إيه المشكلة في ناس بتعمل وبتجيب وبتتهادى بعربيات وألماظ هي الكحكة في إيد اليتيم عجبة؟.
وأوضح:"اتقال إن السبوع اتصرف عليه ملايين وعربية بـ 10 مليون دولار، إزاي دي العربية كانت مخلعة والكلام ده مش حقيقي روحوا واسألوا على القاعة بنفسكم، وكل اللي حضروا معلمين ونجوم بيحبوا بيكا، والدنيا كلها بتعمل كده، وأكبر من كده بكتير ولا علشان أنا حمو بيكا".
واختتم: "في إيه يا جماعة من وقت السبوع لحد دلوقتي كنت في مشاكل شخصية من الحسد، وده مذكور في القرآن، والحمد لله عديت وبنتي الأميرة تاج في حضني وربنا يخليها ليا ولما ربنا يديني هعملها أكتر من كده، علشان أنت بذات نفسك بتشتغل علشان عيالك وتتمنى تجيب لعيالك نجمة من السما".
