غادة عبد الرازق : كنت بتجوز أشخاص أكبر مني بـ 25 سنة بسبب وفاة والدي
![غادة عبد الرازق](https://media.elamwal.com/img/23/12/17/238418.jpg)
كشفت الفنانة غادة عبد الرازق عن سبب زواجها ا برجال أكبر منها سنا وذلك خلال حلولها ضيفة على برنامج كتاب الشهرة الذي يقدمه الإعلامي اللبناني علي ياسين و يذاع على قناة الجديد اللبنانية.
وقالت غادة عبد الرازق: وفاة والدي وأخويا وأنا في سن صغير خلاني ارتبطت بأشخاص أكبر مني، وبعد والد روتانا ارتبطت مرتين بالأكبر مني في السن جدًا.. وكنت بحاول أدور على بابا تاني، والمبرر في إني كنت بتجوز حد أكبر مني بـ 25 سنة إني كنت بدور على بابا مش حب.
وتابعت غادة عبد الرازق: أنا كنت دلوعة بابا جدًا، وقبل ما بابا يتوفى بـ 3 أيام كان مبسوط لأنه وقتها كان هيبقى وزير للاستثمار وقال إنه بعد 3 أيام هيمسك المنصب، وتاني يوم كان عنده جلسة في مجلس الوزراء وجاله هبوط حاد في الدورة الدموية ونقلوه المستشفى وروحنا بالليل لقيناه كويس وكان بيضحك ويهزر وروحنا وكنا بايتين عند ولاد خالتي وتاني يوم قالولنا روحوا البيت واحنا في الطريق عرفت إن بابا اتوفى ومش فاكرة ساعتها انكسرت ولا ضعفت.
وأضافت: أنا عمري في حياتي ما روحت لـ قبر بابا لأنه مدفون في الشرقية، وروحت لـ قبر ماما مرتين من يوم ما اتوفت من 18 سنة وتعبت نفسيًا جدًا، لأني روحت الساعة 2 الصبح وفجأة تملكني الخوف أن إزاي أنا دخلت المقابر في الوقت ده ومن ساعتها وأنا بتعالج من الخوف.
وعلى الجانب الأخر، بدأت غادة عبد الرازق تصوير مسلسل "صيد العقارب" استعدادا لعرضه في موسم دراما رمضان 2024، ويشاركها العمل رياض الخولي وسيمون، والمخرج أحمد حسن والمؤلف باهر دويدار.