ربنا يبارك في عمرك .. أسما شريف منير توجه رسالة شكر لطليقها
شاركت الفنانة أسما شريف منير جمهورها صور تجمعها بطليقها الأول محمود السكري و ابنتهما لارا عبر حسابها الرسمي بموقع التواصل الاجتماعي"إنستجرام".
وأرفقت أسما شريف منير الصور برسالة لطليقها، كاتبه: "الأب المحترم، السند والضهر، دي ذكريات بحوشهالك عشان تعرفي قد ايه باباكي راجل وأب حقيقي بمعنى الكلمة، واقف مهتم بكل خطوة كأنه كأس العالم، لازم أديك حقك عشان الناس تتعلم منك يعني ايه انفصال محترم وتحضر ووجود في حياة ولادنا".
وتابعت: "ربنا يبارك في عمرك ويخلينا ليها دايماً لعبتي حلو اوي النهاردة حقيقي فخورة بيكي، ربنا يحفظك يا نور عيني".
وكانت أسما شريف منير، أعلنت مؤخرا انتظامها في الصلاة، حيث كتبت في منشور عبر حسابها : كل يوم أربعاء كنت بسهر مع صحابي، وكل مرة حتى لو بنبسط يوميها تاني يوم بيكون يوم وحش أوي، وكل مرة أقول مش هروح وبضعف وبروح، بقالي 12 يوم مرحتش، وده بدأ بأني حاسة إني عمري ما هعرف أرقص وأهيص في الوقت الصعب ده وبعدين بقى إحساس ليه علاقة بيا أنا واختياراتي.
وأضافت: انهاردة روحت مسجد صالح الجعفري وصليت، وروحت بعدها مرقد الإمام الحسين وصليت صلاة العشاء، وكان احساس في منتهى الهدوء والسكينة وقلبي كان مطمن وسعيد، وأنا رجعه البيت عديت من جنب المكان اللي كنت بسهر فيه، قعدت اسبح لحد مروحت حسيت وكأني طلعت الأولى على المدرسة، أحساسا كدة مليان بالقوة والانتصار على الشيطان وعلى نفسي.
واختتمت: ده مش عشان أنا ضد السهر، خالص بس أنا ضد أنها تبقى دي محور حياتي، ويوم ثابت كده التوازن مهم في كل حاجة، وأنا مبسوطة أني كل شوية بفوق وبصلح وحدة وحدة، أنا بقول الكلام ده عشان عارفة إن في ناس زيي محتاجين يعرفوا إنهم مش لوحدهم، وأن هيجي عليك وقت تحس إنك محتاج تفوق وساعتها حقيقي هتكون سعيد بجد مش من برا بس ولا في السهرة بس، السعادة هتملي قلبك كله، ربنا يهدينا كلنا يا رب.
