أسما شريف منير بعد انتظامها في الصلاة: مبسوطة أني كل شوية بفوق وبصلح وحدة وحدة
عبرت الإعلامية أسما شريف منير، عن سعادتها بعد انتظامها في الصلاة خلال الفترة الأخيرة ، مشيرة إلى أنها ابتعدت تدريجيًا عن السهرات الليلية برفقة أصدقائها.
وكتبت أسما شريف منير، عبر حسابها الرسمي على موقع الصور الشهير “انستجرام” منشورا قالت فيه: كل يوم أربعاء كنت بسهر مع صحابي، وكل مرة حتى لو بنبسط يوميها تاني يوم بيكون يوم وحش أوي، وكل مرة أقول مش هروح وبضعف وبروح، بقالي 12 يوم مرحتش، وده بدأ بأني حاسة إني عمري ما هعرف أرقص وأهيص في الوقت الصعب ده وبعدين بقى إحساس ليه علاقة بيا أنا واختياراتي.
وتابعت : انهاردة روحت مسجد صالح الجعفري وصليت، وروحت بعدها مرقد الإمام الحسين وصليت صلاة العشاء، وكان احساس في منتهى الهدوء والسكينة وقلبي كان مطمن وسعيد، وأنا رجعه البيت عديت من جنب المكان اللي كنت بسهر فيه، قعدت اسبح لحد مروحت حسيت وكأني طلعت الأولى على المدرسة، أحساسا كدة مليان بالقوة والانتصار على الشيطان وعلى نفسي.
واختتمت أسما منشورها: ده مش عشان أنا ضد السهر، خالص بس أنا ضد أنها تبقى دي محور حياتي، ويوم ثابت كده التوازن مهم في كل حاجة، وأنا مبسوطة أني كل شوية بفوق وبصلح وحدة وحدة، أنا بقول الكلام ده عشان عارفة إن في ناس زيي محتاجين يعرفوا إنهم مش لوحدهم، وأن هيجي عليك وقت تحس إنك محتاج تفوق وساعتها حقيقي هتكون سعيد بجد مش من برا بس ولا في السهرة بس، السعادة هتملي قلبك كله، ربنا يهدينا كلنا يا رب.
