سمية الخشاب عن نجاح أغنية ”موجة”: هي مناسبة جدًا للوقت ده وصورناها في درجة حرارة 40
عبرت الفنانة سمية الخشاب عن سعادتها بردود الأفعال على أغنية "موجة"، التي طرحتها مؤخرًا عبر موقع "يوتيوب".
وقالت سمية الخشاب، خلال لقائها مع برنامج “et” بالعربي: أنا عملت دعاية وصورت في البيت بلبس غير بتاع الكليب، ومن بعد نص ساعة ما نزلت الفيديو على تيك توك لقيته بيعد مشاهدات وبقى 5 ملايين مشاهدة، وفي 3 أيام على مواقع التواصل الاجتماعي مشاهداته تخطت الـ 13 مليون وده رقم أنا مكنتش أحلم بيه الكليب لسه منزلش يا جماعة.
وأضافت: أنا سعيدة جدًا بنجاح أركب على الموجة، والنجاح كان غير متوقع في ساعات من نزولها، خاصة أن الأغنية نزلت في وقت صح في ظل الأجواء اللي إحنا فيها وانقطاع الكهرباء والناس اللي متعودة على التكييف، وإحنا صورنا الكليب في وقت صعب أوي وفي الغردقة ودرجة الحرارة فيه 40، وكل الفنادق كانت مليانة فكان صعب إننا نصور من غير ما الناس تبقى باصة على الكاميرا كنا بنعاني من ده.
وتابعت: لكن الحمد لله المكان اللي صورنا فيه كان فيه ناس أجانب ورانا ومكنوش مركزين مع الكاميرا والحمد لله تفاعلوا أوي مع الأغنية وكانوا مبسوطين بيها.
وواصلت: الأغنية جريئة وجميلة شبابية ولذيذة وخفيفة للصيف، وشيلنا كلمات وحطينا مكانها كلمات تانية، وهي مناسبة جدًا للوقت ده، وقالوا لازم تتصور فيديو كليب.
وعن انتقادات الجمهور لبعض كلمات أغنية الموجة، قالت: بقول في الأغنية أنفخ عوامة مفسية ودي جملة عادية، بس إحنا مصريين دمنا شربات وبناخد الحاجات في الإطار اللي بيضحكنا، ودي خفة دم المصريين لازم نتوقع منهم دي، ولما جيت وقت تغيير الكلمات في الأغنية قولتلهم الكلمة دي جريئة والناس هتحط عليها كلمات، ولكن ده العادي ده كلام الشارع.
يذكر أن أغنية "أركب الموجة" لـ سمية الخشاب من كلمات الشاعر كريم تايسون والكليب من إخراج إبرام نشأت.
