علا غانم تفتح النار على زوجها: نصب عليا وكتب البيت باسمه.. وكنت عملاله مرتب 7 ألاف دولار
تحدثت الفنانة علا غانم عن تفاصيل صادمة عن زوجها رجل الأعمال عزيز حسن، ذلك خلال حوارها مع الإعلامية ريهام سعيد فى برنامجها صبايا على قناة الشمس.
وقالت علا غانم: في 2018 جوزي نصب عليا وكتب البيت باسمه، وكنا اصحاب بس مكناش زوج وزوجة، ولحد دلوقتي مش عارفة أطلق، وبقالي سنتين رافعة خلع ومن 5 سنين طلاق للضرر وبعدها دخلنا تفاوضات معاه وكنا أصدقاء بيساعدني في شغلي عشرة 13 سنة وكنا صحاب.
وتابعت علا غانم حديثها: أنا مش عيزاه ورفضاه أنا محبتهوش جوازي منه كان قرار ومش زعلانة على عمري اللي ضاع وأنا حققت حاجات كتير مهمة نفسي ونجاحات في شغلي وعلا الست انا لغتها من زمان، يمكن عشان بيقولولي انت ست جامدة دايما وأنا مش محتاجة الراجل في حياتي.
وأضافت : خلاني أبيع بيتي من غير ما أعرف ونصب عليا والأذية مبقتش خيانة وكذب بس، أنا كنت وصلت لدرجة إنه مش عيزاه يلمسني وفيه ستات كتير جدا بتتخان وأما كنت بواجهة كان بيتهمني بالجنون فوصلت لحالة تبلد وسنين مكنتش بخرج معاه لأني لما كنت بخرج معاه كان بيبص على الستات مكنتش بغير عليه ولا فيه مشاعر ولا أي حاجة وبقى طلب الطلاق منطقي لأن مفيش حياة.
وأوضحت : في 2022 طلبت منه الطلاق وهديك حصة في الشركة بتاعتي ودخل في تفاوض معايا واتفقنا على إنه ياخد 16% في مقابل الطلاق وخلاص أصبحنا منفصلين، بعد ما خدنا الأوتيل وخد حصته قولتله يلا نطلق رفض لكن أنا كنت ممضياه وفضل يقولي انتي حب عمري وخدت ده على قفايا وفضلت مستمرة في قضية الخلع.
واتمت: احنا مكناش عايشين مع بعض أنا كنت مأجراله بيت وعملاله مرتب 7 ألاف دولار ومكنش عايش معايا في نفس البيت وعربيته وكل حاجة خاصة بيه أنا اللي بدفعه كان بيصعب عليا وسيباه عشان مكنش ليه مكان يعيش فيه اللي عيشته الشهر اللي فات هي دي الجريمة والكابوس اللي مش قادرة أصدقه.
وكانت علا غانم كشفت عن أزمة تمر بها مع زوجها، بعد استغاثتها من خلال حسابها في "إنستجرام" لحمايتها منه بعد أن اقتحم منزلها مع "بلطجية" لطردها منه في منتصف الليل، في حين قال زوجها إنها ووالدتها اعتدتا عليه بـ"الشوم" وأنه حرّر محضرًا ضدها.
آخر أعمال علا غانم
يذكر أن آخر أعمال علا غانم، فيلم "الفندق" الذى عرض عام 2017، وشارك فى بطولته محمد نجاتى ومروة وأحمد بدير وإخراج عاطف شكرى، كما شاركت فى نفس العام خلال مسلسل "طعم الحياة" مع سامو زين وساندى وحسناء سيف الدين وإخراج عبد العزيز حشاد، اضافة إلى مسلسل "ظل الرئيس" مع ياسر جلال ومحمود عبد المغنى وهنا شيحة وإخراج أحمد سمير فرج.
