عارفة عبد الرسول توجه رسالة للفتيات: حبي شكلك.. مناخيرك الكبيرة و سنانك المعوجة دي ميزة
قامت الفنانة عارفة عبد الرسول بتوجه رسالة للفتيات، عبر حسابها الرسمي بموقع التواصل الاجتماعي فيسبوك.
وقالت عارفة عبد الرسول : كلمتين محشورين في زوري حاقولهم ورزقي على الله...ليه مسلسل بالطو نجح النجاح المدوي ده...لانه شبهنا بتاعنا...مافيش حد ماشافش حته منه او حد شبهه في طرشوخ الليف تقول لنفسك فجأة..اه والله كان بيحصل كده.
وتابعت: احنا كممثلين ماكناش احنا ...بس كنا احنا...وفي كلمه قالهالي المخرج عمر المهندس على جنب كده...لما كان بيعمل الكاستينج للمسلسل داه عشان يلاقي بنت شبهنا من طبقه متوسطه ومن مدينه في الريف تبقى دكتوره في وحده صحيه في ارياف برضه...كل البنات لاعبه في شكلها وتاتو وشفايف وحواجب....كلهم دكتور تجميل واحد عامل قالب واحد.
وأضافت: وقع الاختيار على مريم الجندي...مش عشان هي بنت محمود الجندي ولا اخت احمد الجندي...ولا عشان هي ممثله كويسه...رغم انها ممثله ممتازه...ولاعشان كانت في ورشه استاذنا خالد جلال ولفت لفه حلوه ع المسرح ...اتكحرتت يعني....كل ده مكانش سبب لترشيحها للدور...السبب كان شكلها العادي...بنتنا...مننا...صرخه مكتومه من قلبى للبنات....ارجوكم... حبى شكلك اللي ربنا وهبه لك ...مناخيرك كبيره شويه وماله دي ميزه...سنانك معووجه مايضرش دي ميزه ...ارجوكم...كونوا عاديين.
مسلسل "بالطو"
يذكر أن مسلسل "بالطو" مأخوذ عن رواية "بالطو وفانلة وتاب" وهو بطولة عصام عمر، محمود حافظ، محمد محمود، عارفة عبدالرسول، مريم الجندى، عارفة عبد الرسول محمد رضوان، وعدد من ضيوف الشرف أبرزهم وبيومي فؤاد، خالد الصاوى، محمد لطفى، محمود البزاوى، وإخراج عمر المهندس وتدور أحداثه في إطار كوميدى حول مهنة التمريض وما يحدث بدور الرعاية الصحية.
