تامر عاشور يرد على الانتقادات الموجهه له بسبب صورته مع مريضة السرطان
شهدت الساعات القليلة الماضية غضب كبير من رواد موقع التواصل الاجتماعي "فيس بوك" على الفنان تامر عاشور وذلك بعد نشره لصورة برفقة طفلة مريضة "بالسرطان"، معلقا عليها :" لا خدي انتي انا صايم يافاطره..بحبك".
وأغضب هذا التعليق رواد موقع التواصل الاجتماعي ،ليقوم تامر عاشور بالرد علي الانتقادات التي طالته بسبب صورة الطفلة المريضة بالسرطان .
وكتب عبر حسابه الرسمي عبر موقع "فيس بوك": "صباح الخير - انا طول حياتي ومشواري عمري ما اتريقت على حد سليم علشان اتريق على مريض حاش لله - واللي اخد كلامي تريقه على مريض نفوسهم ضعيفه وهم اللي مرضى بيفرقوا بين المريض والشخص الطبيعي".
وتابع:" لو نزلت صورتي مع اي طفل " اللي هو غير مُكلف بالصيام " وقولتله باي طريقه "متشربش مياه قدامي يا فاطر " او "خد دي يا فاطر انا صايم " حد هيتكلم ؟ مستحيل علشان طفل طبيعي. لكن المريض لا منهزرش معاه زي الطبيعي علشان هو مريض ونفضل نقوله مريض مريض مريض ونحسسه بمرضه من تعاملاتنا -المرض الحقيقي هو التفرقه بين اطفالنا اللي بصحه جيدة ربنا يديهم كل الصحه واطفالنا اللي ربنا اختارهم للمرض".
وأضاف عاشور:" المرض الحقيقي هو ان فكرة " المعايرة " جاتلك قبل ١٠٠ فكرة تانية ممكن تجيلك من جمال البنت وضحكها وبهجة الصورة، وللأسف شوفت كمان حاجة غريبة جدا. ناس كتير قوي محسوبين على "هامش هامش هامش المجال الفني " عمرهم ما شافو مني حاجه وحشه غير اني مباديهمش مواعيد لاقيتلهم تعليقات كأنهم ما صدقوا لاقولي غلطه وانصحهم "العمر بيجري حاولو تعملو حاجه لنفسكم أولى". البنت اللي في الصوره فضلت في حضني طول تصوير الاعلان وبحبها جدا جدا. ومتفقين انا وهي على حاجات كتير قوي قوي هنعملها".
من ناحية أخرى، غنى تامر عاشور تتر مسلسل "ولاد ناس" الذي يعرض حاليًا ضمن الموسم الدرامي في رمضان، والأغنية كلمات دعاء عبدالوهاب وألحان تامر عاشور وتوزيع طارق مدكور.
ومسلسل "ولاد ناس" بطولة أحمد وفيق، رانيا فريد شوقي، صبري فواز، بيومي فؤاد، إيهاب فهمي، لقاء سويدان، أحمد صيام، صفاء الطوخي، وآخرين ومن إنتاج "سكوير ميديا" للمنتجين منى قطب وإبراهيم حمودة، وتأليف وإخراج هاني كمال،.
