خالد الصاوي يحذر من أدوية التخسيس السريعة: أخدت حقن وكانوا هيموتوني
حذر الفنان خالد الصاوي جمهوره من أدوية التخسيس السريعة، مشيرا إلى أنه تناول حقن لخسارة الوزن تسببت له في توقف الجهاز الهضمي ودخل إلى المستشفى على أثرها.
وقال خالد الصاوي خلال حواره مع الإعلامية ياسمين عز، مقدمة برنامج "كلام الناس" المذاع عبر قناة "إم بي سي مصر" : "خسيت 20 كيلو وناقص 20 كمان، وعايز أحذر الناس أنا أخدت الحقن حصلي كارثة بعد 3 أو 4 شهور حقنة منهم أدت إلى توقف الجهاز الهضمي وروحنا المستشفى وقعدت يومين، قلت لخبير التغذية واتفقنا إننا نرمي الحقن".
وأضاف: "يا جماعة خلوا بالكم الحقن دي مقصود بيها أنها تسد النفس، أو توهم الجسم أن في حالة شبع وبتلعب في الجهاز الهضمي خلوا بالكم من الحقن دي".
وتابع: "أثبتت التجربة أن كل اللي عايز يوصل لحاجة بأرخص مجهود دي سكك فاشلة، لازم تعمل دايت وهو ده هيخسسك شوية بشوية ويكون في خبير تغذية بيتابعك، هتروح الجيم في حدود مسموح بيها علشان متجوعش وتعطش دا المجهود اللي لازم تعمله، الحاجات السريعة زي فتح البطن لأ مش هعمل كده لإن مش معقولة مش هفتح بطني عشان مش عارف أقفل بوقي".
واختتم حديثه : "أنا على ما اخدت بالي أن شكلي مش تمام كان كل الناس بتقولي خس، لازم تبقى متواضع وتسمع للناس، وبلاش المراية اللي بتطبطب عليك وتقولك أنت أحلى حاجة أو بتجلدك".
على الجانب الأخر، تعاقد خالد الصاوي على المشاركة في الموسم الخامس من مسلسل "المداح"، المقرر عرضه في شهر رمضان 2025.
