أبرز تصريحات علاء عوض مع ياسمين عز.. اتعملي أعمال سفلية و بصرف 70٪ من فلوسي على الكلاب
حل الفنان علاء عوض ضيفا مع الإعلامية ياسمين عز ببرنامجها كلام الناس على قناة إم بي سي مصر، وأطلق العديد من التصريحات الهامة التي أحتلت مواقع التواصل الإجتماعي.
أبرز تصريحات علاء عوض
وكشف علاء عوض عن أسباب فشل زيجاته الأربعة، و رأي العائلة في دخول الفنانة جميلة عوض عالم التمثيل.
وقال علاء عوض: "أنا حظي كان وحش في الجواز أول مرة اتجوزت كان بعد التلاتين، أول زوجة رفضتني والدتها عشان أنا فنان وشافتني شقي، هي كانت مغنية أوبرا اسمها مها خليل، اتجوزنا غصب عن والدتها فكانت كرهاني فابتدت تعملي أعمال سفلية وبعد سنة قلت لها حرام مش هنقدر نعيش إنتي في صراع بين جوزك اللي بتحبيه وأمك".
وتابع : "لما حصل كده اتكسرت في أول حب في حياتي ورحت أتجوزت التانية والتالتة والرابعة ورا بعض في 3 سنين".
وأضاف: أنا عندي 5 بنات اللي هما بنات إخواتي، وكان عندي فرص كتير أخلف واخترت إني مخلفش، واخترت إني أربي كلاب، هما حياتي كلها وبصرف عليهم 70% من فلوسي.
وعن رأي العائلة في دخول جميلة عوض عالم الفن ، "جميلة صدمتنا كلنا، هي بدأت مسيرتها الفنية بمسلسل تحت السيطرة، ولم تكن تتحدث من قبل عن دخولها المجال، ولم نقم بمساعدها إطلاقا لدخول عالم الفن، وهي اعتمدت على نفسها ونجحت دون أي واسطة".
أما عن فيديو رقصته مع جميلة عوض في عقد قرانها على المونتير أحمد حافظ: عملت رقصة مع جميلة بـ”نكلة" وده واحد على مليون وطلع تريند، أومال لو شافوا اللي كنت بعمله زمان، كانوا هيقفلوا علينا التريند.
وأشار في حديثه أن جميلة تأخرت في الزواج، واحنا فرحنا لما اتجوزت أحمد حافظ المونتير رقم واحد في مصر، واحنا مطمنين، ويا رب محدش يقرّ عليها؛ هي جميلة كده ورايقة مع نفسها سيبوها، هما مكملين بعض.
واتجه حديثه عن والديه الراحلين، موضحًا أن والدته دخلت في حالة شديدة من الحزن بعد رحيل والده الفنان محمد عوض، قائلًا: “أنا خدت خبطات كتير في حياتي وكبيرة، وأبويا وأمي ماتوا في 50 يوم، أمي كانت بتعشق أبويا وخدت الـ 40 بتاعه، وهي في حالة صمت، ودخلت 25 يوم الإنعاش، وتوفت بعد وفاته بـ 55 يوم.
