كندة علوش تكشف عن مكالمتها مع محمد صلاح لدعمها في رحلتها مع السرطان
كشفت الفنانة كندة علوش عن تلقيها مكالمة هاتفية من محمد صلاح لاعب ليفربول الإنجليزي، ليدعمها في رحلة علاجها من سرطان الثدي.
قالت كندة علوش: عمرو كان قاعد فجاله مكالمة أثناء فترة مـرضى ، فلقيته بيقول اه ازيك اه طبعاً ايه ده و لقيته متحمس وحبيبي وانت حبيبي وبعدين بيقوله هي كويسة؟ .. وأنا مع العيـال مش مركزة بقوله مين يا حبيبي ؟ بيقولي محمد صلاح .. قولتله مين محمد صلاح؟ قالي محمد صلااح .. قولتله محمد صلاح مو صلاح ؟ قالي اه قولتله ليه ؟ .. يعني انت احنا أكيد بيج فإن وهو عارف عمرو بس مش اصدقاء مفيش تواصل، وقولت له (يا عمرو أنا مش مصدقة، إيه اللذاذة والحلاوة دي)..
وتابعت: قالي عرف من أصدقاء مشتركين انك تعبـانة و جاب نمرتي واتصل قاله أنا سمعت إنه كندة كذا و مهانش عليا وعايز أقولك في أي لحظة أنا بيتي موجود لو عايزين تيجوا تعملوا Check up هنا او تبعتولي الورق وأنا اخده عند دكاترة هنا.
وأضافت: بعدها بفترة لقيت عمرو بيتكلم بنفس الحماسة وبيندهلي بقوله مين؟ يقولي تعالي فيه حد عايز يكلمك تعالي بس وأنا بمسك التلفون قالي "محمد صلاح" قولتله ازيك فـ قالي طمنيني قولتله "أنا كويسة جداً أنا خلاص بقيت كويسة" وكنت بكلمه بنفس الحماس وهو متفاجئ من تون الصوت فـ لقيته بيقولي تاني "عايزك تعرفي إن ليكي عيلة و ليكي بيت واسمحيلي إني أتطمن عليكي تاني".
واختتمت : قد أيه هو إنسان حقيقي وبسيط إنه هو دور على النمرة واتصل أول مرة وتاني مرة بأشخاص هو يعرفهم من بعيد و يقولي انتي عارفة انتي غالية انتي علينا قد ايه؟ قولتله انت اللي غالي.
