أحمد أدم عن فيديو هجومه على تامر حسني: طيب عاندوني وطلعوني غلط
علق الفنان أحمد آدم على تداول فيديو هجومه على الفنان تامر حسني، من برنامجه على قناة الحياة "آدم شو".
وقال أحمد آدم خلال برنامجه: "الكلام الأسبوع الماضي كله كان عني، والخبر أحمد آدم يهاجم تامر حسني، مع إني قلت أنا عامل مقطعين، ومقطع الهجوم على تامر حسني سيتحول إلى تريند".
وتابع: "يعني أنا أقول في فخ وأشاور عليه، ومع ذلك يقعوا فيه، طيب عاندوني وطلعوني غلط، إنما التريند لازم يبقى ذم وشتيمة وقلة أدب، وأثبت لكم بالدليل العملي إن التريند كلمة مشبوهة".
وعن رد فعل تامر حسني بعد انتشار فيديو الهجوم عليه، قال : "كنت متخيل إن تامر ممكن يزعل، لكن هو علشان ذكي لما حد بعتله الفيديو شاف الحلقة كاملة وفهم الموضوع، وكتب بوست أكد فيه إن الكلام السلبي هو اللي هينتشر".
هجوم أحمد أدم على تامر حسني
وكان أحمد أدم قال في الفيديو الذي هاجم فيه الفنان تامر حسني : "تامر حسني مين مش واخد بالي، مش كفاية عليك كدا بقا ولا إيه، أول ما طلع طلعلنا شعر صدره وقعد يمصمص في شفايفه ويسبّل للبنات".
وتابع: وبيقدم شوية أغاني تعبانة ويعني إيه أكتر حاجة بحبها فيكي.. طيبة قلبك.. إسفاف، وأفلامه وحشه جدا، وهو اللي بيألف وبيخرج وهو اللي بيعمل موسيقى تصويرية، وهو اللي بيقطع التذاكر بيعمل كل حاجة، معقولة؟ إيه اللي يجيبه لأنور وجدي دا؟ أنت مغني ولا كوميديان ولا مونولوجيست ولا إيه بالظبط؟ كفاية عليك كدا يا تامر.
تامر حسني يعلق غلى فيديو هجوم أحمد أدم
ونشر تامر حسني الفيديو الكامل لحديث أحمد آدم عنه عبر حسابه الرسمي بموقع التواصل الاجتماعي "إنستجرام"، وعلق كاتبًا: أستاذ أحمد آدم فعلا بيدي درس حقيقي بيشرح فيه سمات العصر الحالي اللي كلمة تريند فيه جننت عقول بعض الناس وخليتهم يبيعوا مبادئهم وصداقتهم وأمانتهم لمجرد أن الناس تعرفهم أو تتكلم عليهم ولو ليوم واحد و نسيوا أنه لا يصح إلا الصحيح عشان ده عدل ربنا، وأي أفاقين مع الوقت هتلاقيهم بيختفوا والمحترم الحقيقي هو اللي بيستمر أصل لما نهتم ونرد على كل كداب أمال اللي بيحبونا نعمل معاهم إيه !!!!؟
وتابع: تابعوا قلوب الناس والمواقع اللي هتاخد كلام الأستاذ أحمد السلبي وينشروه، وعلموا عليهم عشان تعرفوا حقيقتهم … والحقيقة أن فعلا الكلام السلبي هو اللي انتشر شكرا أستاذ احمد آدم لكلامك وإشادتك الحقيقية في حقي هي شهادة عظيمة من فنان محترم وكبير بفنه وأخلاقه.
