آسر ياسين يوجه رسالة مؤثرة لمساعده الراحل:مفيش طفل يشوفه غير ولازم يبتسم .. حقيقي واحشني
كتب الفنان آسر ياسين، كلمات مؤثرة، نعى بها مساعده الشخصي مجدي، بعد رحيله عن عالمنا من ثلاث أسابيع.
وقال آسر ياسين في رسالته: "إهداء لمجدي، كان المساعد بتاعي لأكتر من 14 سنة، قصته فيها كمية عِبر حياتية غير طبيعية، اشتغل كهربائي لمدة تلاتين سنة وبعد كده حصلتله حادثة موت اتكتبله فيها عمر جديد".
وتابع: "من هنا ابتدا يشتغل مساعد ليا بناءًا على نصيحة أبويا اللي رشحهولي عشان إخلاصه وأمانته.. عمره ما كان يتخيل إنه يشتغل في السيما ويقابل روبي ومني زكي ومحمود حميدة، ومش بس كده، ده كمان وقف قدام الكاميرا كذا مرة في أدوار شرفية كل الناس حبته لأنه يخش القلب علطول لطيبته وبساطته".
واستكمل: "كان يخاف عليا جداً بالذات في مشاهد الأكشن، وكنا ساعات بنتقمص من بعض لما نخش في حوارات عبثية عن الحياة وبعدها نقوم مهيفيين بأي كلام زي الصورة اللي في البوست، واللذيذ في الموضوع إنه كان ييجي يسألني عن نصيحتي في حاجات شخصية على رغم فرق السن".
وأضاف: "مفيش طفل يشوفه غير ولازم يبتسم لا إرادياً بسبب وشه البشوش والطفولي.. مجدي رحل عن عالمنا من ٣ أسابيع ، ولحد النهاردة أنا ما اتكلمتش عنه. يمكن لأني بتجنب ده أو أني معتبره ماحصلش، مش عارف.. بس اللي عارفه كويس أوي أنه حقيقي واحشني".
وعلى الجانب الأخر، أعلنت الشركة المنتجة خروج مسلسل "نسيت كلمة السر" لـ إسر ياسين من السباق الدرامي لموسم رمضان 2023، والعمل المأخوذ عن رواية بنفس الأسم للكاتب حسن كمال، حيث تدور أحداثه في إطار من التشويق والإثارة.
آخر أعمال آسر ياسين
يذكر أن آخر أعمال آسر ياسين، بمسلسل سوتس بالعربي الذي تم عرضه في الموسم الرمضاني لعام 2022، والعمل من تأليف، آرون كورش إخراج عصام عبد الحميد سيناريو محمد حفظي، ياسر عبد المجيد، محمد جلال، محمود نصار، سارة الطوبجي، نادين بدراوي بطولة آسر ياسين، أحمد داود، صبا مبارك، ريم مصطفى، محمد شاهين، تارا عماد.
