يسرا اللوزي تنتقد السوشيال ميديا: ” بقى فيه هوس بإن إحنا دايما لازم يطلع شكلنا مثالي”
اتهمت الفنانة يسرا اللوزي "السوشيال ميديا" بأنها جعلت الناس مهوسين بالتجميل والاهتمام المبالغ فيه بالظهور بشكل مثالي في الصور طوال الوقت.
وقاالت يسرا اللوزي خلال مقطع فيديو نشرته عبر حسابها الرسمي على موقع الصور والفيديوهات “إنستجرام”: "أنا ملاحظة إن من ساعة الناس كلها بقت مهتمة بالسوشيال ميديا، ابتدا يبقى فيه هوس بإن إحنا دايما لازم دايما يطلع شكلنا مثالي كإننا طالعين من مجلة، سواء مشاهير أو ناس عادية، كل الناس بقيت تعمل إيديت للصور بتاعتها وبتحاول تثبت دايما للآخرين أن شكلهم هايل طول الوقت، وفي الحقيقة ده مش واقعي بأي شكل من الأشكال".
وتابعت: "إحنا كلنا بشر وبنمر بفترات مختلفة في حياتنا وبأزمات، وده بيأثر على شكلنا وجسمنا، ومفيش أي حاجة عيب في كدة، أتمنى أن إحنا نحترم ده في بعض ونقدره ونهتم أكتر بإن إحنا نبقى كويسين ونفسيتنا كويسة ومرتاحين في حياتنا عن إن يطلع شكلنا حلو وخلاص".
وأضافت: "في الفترة إللي فاتت أنا شخصيا اتعرضت للتنمر كتير على السوشيال ميديا خاصة بعد ما بقيت أم، في بعض الناس بتكتب تعليقات جارحة وسخيفة بتأثر عليا بشكل كبير وتخليني معنديش طاقة أو قوة إرادة إن أنا أهتم بنفسي، بيجيلي إحباط بيخليني مقدرش أقوم من السرير أعمل حاجة مفيدة لنفسي، أتمنى إننا نبقى راحمين ببعض أكتر، ومنتنمرش على بعض".
أخر أعمال يسرا اللوزي
يذكر أن أخر أعمال يسرا اللوزي فيلم "العنكبوت" الذي عرض في السينمات ضمن سباق أفلام عيد الفطر، وهو من بطولة: أحمد السقا، منى زكي، ظافر العابدين، ريم مصطفى، محمد لطفي، أحمد فؤاد سليم، زكي فطين عبدالوهاب، أكرم الشرقاوى، محمود غريب، وعدد من ضيوف الشرف، ومن تأليف محمد ناير، وإخراج أحمد نادر جلال.
