تزامنًا مع مسلسل الاختيار.. معلومات عن الشهيد البطل أحمد المنسي
الشهيد البطل العقيد أحمد صابر المنسي، وُلد في مدينة منيا القمح بمحافظة الشرقية عام 1977 م والتحق بالكلية الحربية و تخرج ضمن الدفعة 92 حربية ضابطًا بوحدات الصاعقة، خدم الشهيد لفترة طويلة في الوحدة 999 قتال وحدة العمليات الخاصة للصاعقة بالقوات المسلحة والتحق بأول دورة للقوات الخاصة الاستشكافية المعروفة باسم "SEAL"عام 2001، ثم سافر للحصول على نفس الدورة من الولايات المتحدة الأمريكية عام 2006.
حصل الشهيد على ماجستير العلوم العسكرية "دورة أركان حرب" من كلية القادة والأركان عام 2013 وتولى الشهيد قيادة الكتيبة "103" صاعقة خلفًا للشهيد العقيد رامي حسنين الذي استشهد في شهر أكتوبر عام 2016، والشهيد كان مشهودًا له بالكفاءة والانضباط العسكري وحسن الخلق من الجميع وهو متزوج وأب لثلاثة أطفال.
كشف طارق قطب أحد أصدقاء أحمد المنسي تفاصيل في حياة الشهيد.
وكتب طارق قطب عن حكاية الشهيد أحمد المنسي ووالده الطبيب الإنسان فقال "منسي يعنى الطفل اللى أبوه دكتور شاطر ممارس عام بيعالج الناس بملاليم عشان مؤمن أن الطب اتخلق لعلاج الناس مش لتقليب جيوبهم، دكتور صابر المنسى اللى لما مات في 2013 كان كشفه 5 جنيه، أقل من تمن كان البيبسى، أبوه كان مثله الأعلى وأكتر حد منسى بيحبه في الدنيا، وشاء النصيب أنه يبقى أول واحد يدخل يتدفن جنبه".
وعن بداية رغبة الشهيد في دخول الكلية الحربية فقال "منسي المراهق اللى بيقرر أنه يدخل الكلية الحربية وبعدين الصاعقة عشان عارف هو عايز إيه، وفاهم إن هي دى الحتة اللى هيعرف ينفع فيها بلده وأهله ونفسه، وكان طالب متفوق وطوب الأرض في الكلية عارفه وبيحبه".
وعن صداقاته قال قطب "منسي الضابط فيه مليون حد من زمايله يقدر يتكلم عليه أحسن منى ومئات منهم قالوا شهادات تشيب من عظمتها، إنما أنا شفت منسى نائب ملحق الدفاع اللى اشتغل معانا في باكستان، من أول يوم اتقابلنا وربنا وضع في قلوبنا كلنا محبة غريبة ليه".
وأضاف: "منسي اختار باكستان مع إنها المفروض مش اختيار جذاب لأي حد وكان ممكن يختار بلد تانية لأنه شاطر وليه خاطر عند اللى بيوزعوا الناس، بس اختارها لأن فيها جيش قوي ومتطور حيتعلم منه، وكانت علاقته بكل الناس في باكستان رائعة، وعمل شغل هايل، وكان ممكن يتمدله بعد السنتين بتوعه بس هو فضل ينزل مصر وقال جملته الشهيرة: أنا عايز أسيب المكان لحد غيرى، أنا خدت رزقى خلاص ييجى حد تانى ياخد رزقه.. ودى حاجة مبيعملهاش ناس كتير، أو الحقيقة مبيعملهاش حد أصلا دلوقت".
واستطرد قطب في حكايته عن الشهيد المنسي فقال: "منسي اللي لما رجع مصر كان مع ثورة يناير (بدون تفاصيل)، وكان ضد الإخوان ومع ثورة 30 يونيو (برضه بدون تفاصيل)، وكان راجل موضوعى بيقول على اللى شايفه صح صح، وعلى اللى شايفه غلط غلط، لا غاوى سفسطة ولا يكرر كلام مش متأكد منه ولا يقول معلومة لمجرد أنه سمعها من حد، يقرأ ويحلل وبيسمع وبيفهم وبيتناقش بالراحة مهما كانت سخونة الموضوع".
وعن عمل الشهيد بسيناء قال: "منسى اللي اشتغل في سيناء بمزاجه أكتر من 3 سنين، ولما سابها السنة اللى فاتت قعد يتنطط عشان يرجعلها لحد ما قائد الكتيبة 103 صاعقة استشهد في أكتوبر اللى فات فكلموه قالوله ترجع يا منسي قالهم حالا، ورجع عشان يكمل اللي بدأه، وكان قراره أنه لو ماستشهدش لحد ما يسيب سينا حيعلق عقيد ويطلب يطلع معاش ويرتاح بقى، وكان بيطمنا أن الوضع في سينا بيتحسن وإن قريب حنخلص على الكلاب اللى هناك، وأن رجوعه ممكن يبقى في خلال 6 شهور".
وعن خوف أصدقاء المنسي عليه قال قطب: "منسى اللى كنا من خوفنا عليه بنقوم كل يوم الصبح نتطمن أنه عايش، وبطولاته ضد الإرهاب وداعش في سيناء كانت زى الأساطير اللى الناس بتحكيها بانبهار، وهو لما يحكيلنا عن بعضها بعد زن مننا يتكلم ببساطة كأنه بيتكلم عن مذكرة كتبها وهو على المكتب، أو عن مشوار للسوبر ماركت يشترى حاجة البيت".
وتابع: "منسى اللى كان فيه رتب أعلى منه بتقوله يا قائد، واللي كان ضباطه وعساكره بيعشقوه ويعتبروه أخ كبير وساعات أب، اللى كان بيحسس أي حد بيشتغل معاه أنه مهم وعظيم حتى لو بينه وبين نفسه مش مقتنع بيه بس عشان مايكسرش بخاطره".
وعن عائلة الشهيد المنسي قال قطب: "منسى الأب اللى عنده 3 عيال بيعشقهم، اللى خلى حمزة راجل وهو لسه عنده 10 سنين، اللى بيحترم مراته ويحطها فوق راسه ويكبرها قدام كل الناس، اللى كان طلبه الوحيد لما اتنقل سينا أن أخوه المقدم في الجيش برضه يتنقل مكان أقرب للقاهرة عشان يبقى فيه دايما واحد فيهم قريب من والدته المريضة (ربنا يشفيها ويصبرها)".
وتابع: "منسى البنى آدم جدا جدا، صاحبى وأخويا وأستاذى، الرضا اللى كان جواه وباين على وشه وفي ابتسامته طول الوقت كان مصدر إلهام ودرس دايم ليا وباضرب بيه المثل لغيرى، الشجاعة المفرطة التلقائية السهلة اللى بيعملها وهو مش حاسس بيها، الشاعر اللى بيكتب ويبعتلى ولما أكتب يشجعنى، الراجل اللى ربنا أراد إننا نشوف سوا مواقف ذكرها مش مهم دلوقت وكان ثابت وصاحب مبدأ، اللى كانت الدنيا تبقى بتتهد نحوه مايتهزش إنما موقف عبيط من طفل صغير ممكن يخليه يعيط بصوت، اللى جالنا من العاشر من رمضان للزمالك في آخر إجازة الساعة 11 بالليل وكأنه جاى يسلم علينا وادانا درس في القناعة من غير ما يحس وسلم ومشى".
واختتم قائلًا: "الدنيا مابتجبش زيك كتير يا منسى، ومن حسن حظى إنى عرفتك وكنت صاحبك، ومن حسن حظك إنك روحت لربنا بالطريقة اللى كان نفسك فيها، أنت الكسبان واحنا اللى خسرنا صحبتك، ربنا يرحمنا رحمة واسعة عشان نعرف نجيلك في المكان اللى انت فيه دلوقت، ومافيش حاجة تتقال تانى بعد اللى جدك الكبير قاله امبارح قدام قبرك "كان عنده 4 سنين وشهم.. سلام مؤقت يا شهم".
الكتيبة "103 صاعقة".. موطن العزة والكرامة
في 7 يوليو 2017،استيقظت مصر على خبر استشهاد وإصابة عدد من أبطال القوات المسلحة المصرية فيما عرف بمعركة " كمين البرث"، والذى اشتهر من بين رجاله العقيد أحمد منسي، وأحمد عمر شبراوي، وخالد مغربي.
خبر استشهاد أبطال الكتيبة 103 صاعقة، كان خبرا له وقع خاص فيما بعد، لما عرفه الشعب المصري من بطولات للشهداء، ومن أبرزهم العقيد أحمد منسي، الذى كان من الشخصيات التي لها دور كبير في الحرب على الإرهاب بشمال سيناء، كمان كان حب زملائه له أيضا من العلامات المميزة.
استشهد البطل أحمد المنسى نتيجة إصابته بطلقة رصاص حيث كان فوق سطح المبنى الذى تمت محاصرته من قبل الإرهابيين، وكان الشهيد يطلق النيران على الإرهابيين من فوق سطح المبنى للدفاع عن الكتيبة وباقى زملائه.
كان أحمد منسي، أحد رموز الصاعقة المصرية، كتب يوم وفاة العقيد رامى حسنين، أحد أبطال الصاعقة المصرية، والقائد السابق للكتيبة 103 صاعقة، قائلا: "فى ذمة الله أستاذى ومعلمى، تعلمت منه الكثير، الشهيد بإذن الله العقيد رامى حسنين، إلى لقاء شئنا أم أبينا قريب".
وتقول زوجته السيدة هاجر في ندوة تثقيفية سابقة للقوات المسلحة، وبحضور الرئيس عبد الفتاح السيسى، أن زوجها ترك لها رسالة كان يكتبها للعدو على أرض سيناء قال فيها:" جزيل الشكر لعدوى اللى أتاح ليا الفرصة بعد سنين من التدريبات إنى أواجهه، دخلت أرض الفيروز بأفارولي، وخلانى أصلى فى كل شبر فيها، وأقسم بالله مالكش عيش فيها طول ما إحنا فيها".
أيضا كان الشهيد أحمد عمر شبراوى، من الشخصيات التى لها وضعية خاصة داخل كتيبة 103 صاعقة، كت فى أحد الأيام على صفحته الشخصية بعد استشهاد العقيد رامى حسنين، قائد 103 صاعقة السابق، قائلا:" إنا لله وإنا إليه راجعون، استُشهد البطل والمعلم والأخ والظَّهر والسَّند والقائد، إن العين لتدمع والقلب لينزف على فراقك، وربنا يصبرنا على فراقك، وأقسم بالله ما هنسيب حقك يا أجمل ضحكة وأطهر قلب، ربنا يتقبلك إن شاء الله من الشهداء.. أرجو من الجميع الدُّعاء له ولكل الشهداء.. سلام حتى نلتقى".
أيضا كان خالد مغربى، والشهير بخالد دبابة، بطلا آخر فى سلسلة الشرف لأبطال الجيش المصرى، فى مواجهة العناصر الارهابية والمتطرفة، ولقب "دبابة" أطلق عليه لأنه كان يواجه أى عناصر ارهابية بقوة وشراسة، فاشتهر بين الإرهابيين أنفسهم بأنه دبابة لا ترحم أعدائها ".
بطولات 103 صاعقة جعلت الجميع يغني لها ما عرف باسم "نشيد الصاعقة" وتضمن أسماء الأبطال الذين استشهدوا في الكتيبة وجاءت كلمات النشيد :" قالوا إيه علينا دولا وقالوا إيه؟..قالوا إيه علينا دولا وقالوا إيه؟..منسى بقا اسمه الأسطورة، من أسوان للمعمورة" إلى نهاية الأغنية التى اشتهرت شعبيا وتم ترديدها فى كافة المدارس ومؤسسات الدولة والمصريين المقيمين بالخارج.
البطل الشهيد أركان حرب أحمد منسي كان يتمتع بحب وتقدر قادته والجنود والضباط الذين عملوا معه .
"يا قبورا تنادى أسامينا.. ويا موتا يعرف كيف يصطفينا، سطوة الموت لن تغير لقبنا.. فنحن أحياء للشهادة سائلينا، مهنتى الشرف والمجد أجنيه.. وحب القلب للقلب يرضينا، قد قضيت فى الأمن عدد سنين.. وكم قضينا عن الأرض مدافعينا، وكم قضيت هروبا من الموت.. وكم قضينا عن الموت باحثينا، نبحث عن الموت أينما وجد.. وفى الجنة مع إخوة سابقينا"، تلك مقتطفات من أبيات شعر للعقيد الشهيد أحمد منسي.
